Kaantha OTT Release Date: ஓடிடியில் வெளியாகும் காந்தா திரைப்படம்; எந்த தளத்தில், எப்போது பார்க்கலாம்?

Kaantha Movie OTT Release: துல்கர் சல்மான், சமுத்திரக்கனி, பாக்யஸ்ரீ போர்ஸ் மற்றும் ராணா டக்குபட்டி ஆகியோர் முக்கிய கதாபாத்திரங்களில் நடித்த காந்தா திரைப்படம், ஓடிடியில் வெளியாக இருக்கிறது. இதன் அதிகாரப்பூர்வமான அறிவிப்பு தற்போது வெளியிடப்பட்டுள்ளது.

காந்தா திரைப்படம் ஓடிடி வெளியீட்டு தேதி:

கடந்த நவம்பர் மாதம் 14-ஆம் தேதி திரையரங்குகளில் வெளியான திரைப்படம் காந்தா. பீரியட் க்ரைம் த்ரில்லர் பாணியில் உருவான இப்படம், தற்போது ஓடிடியில் வெளியாகிறது. அதன்படி, வரும் டிசம்பர் 12-ஆம் தேதி நெட்ஃப்ளிக்ஸ் ஓடிடி தளத்தில் காந்தா திரைப்படத்தை காணலாம். தமிழ் மட்டுமின்றி தெலுங்கு, இந்தி மலையாளம் ஆகிய மொழிகளிலும், கன்னடத்தில் ஷாந்தா என்ற பெயரிலும் இப்படத்தை பார்க்கலாம் என்று நெட்ஃப்ளிக்ஸ் எக்ஸ் தள பக்கத்தில் (ட்விட்டர்) பதிவிடப்பட்டுள்ளது.

காந்தா திரைப்படத்தின் கதைச்சுருக்கம்:

1950-களில் மெட்ராஸை கதைக்களமாக கொண்ட காந்தா திரைப்படத்தில் திருச்செங்கோடு கைலாச மகாதேவன் என்ற கதாபாத்திரத்தில் துல்கர் சல்மானும், டி.பி.கே ஐயா என்ற கதாபாத்திரத்தில் சமுத்திரக்கனியும் நடித்துள்ளனர். ஒரு திரைப்படம் எடுப்பதில் குரு மற்றும் சிஷ்யன் ஆகிய இருவருக்கும் இடையே நிகழும் முரண்பாடுகளுடன் இப்படத்தின் முதல் பாதி செல்லும் நிலையில், இதன் படப்பிடிப்பு தளத்தில் ஒரு கொலை சம்பவம் நடைபெறுகிறது. இந்தக் கொலை சம்பவத்திற்கு யார் காரணம் என்பதற்கான விடையை கண்டறியும் விதத்தில் இதன் இரண்டாம் பாதி அமைக்கப்பட்டிருந்ததாக விமர்சகர்கள் கூறி இருந்தனர்.

மேலும் படிக்க: Arasan: வெற்றிமாறன் - சிம்பு கூட்டணியில் உருவாகும் அரசன் திரைப்படத்தில் இணைந்த விஜய் சேதுபதி; சர்ப்ரைஸ் கொடுத்த கலைப்புலி தாணு

காந்தா திரைப்படத்தில் இடம்பெற்ற நடிகர்கள்:

இதில் துல்கர் சல்மான் மற்றும் சமுத்திரக்கனி ஆகியோர் முதன்மை கதாபாத்திரங்களில் நடித்திருந்தாலும், கதாநாயகியான பாக்யஸ்ரீ போர்ஸின் நடிப்பும் மிகச் சிறப்பாக இருந்தது என்று பார்வையாளர்கள் மற்றும் ரசிகர்கள் கூறினர். மேலும், கொலையை கண்டறியும் போலீஸ் அதிகாரியாக இன்ஸ்பெக்டர் தேவராஜ் என்ற பாத்திரத்தில் ராணா டக்குபட்டி நடித்திருந்தார். இவர்களை தவிர ரவிந்திர விஜய், காயத்ரி சங்கர், நிழல்கள் ரவி, பகவதி பெருமாள் மற்றும் வையாபுரி என பல நடிகர்கள் இப்படத்தில் இடம்பெற்றனர்.

ஓடிடி வெளியீட்டில் கவனத்தை ஈர்க்குமா காந்தா?

இப்படத்தை ராணா டக்குபட்டி மற்றும் துல்கர் சல்மான் ஆகியோர் இணைந்து தயாரித்தனர். முன்னதாக, துல்கர் சல்மானின் வேஃபரர் ஃபிலிம்ஸ் சார்பில் தயாரிக்கப்பட்ட லோகா திரைப்படம் மாபெரும் வெற்றி பெற்றது. கல்யாணி பிரியதர்ஷன் முதன்மை பாத்திரமாக நடித்த இப்படம், சூப்பர்ஹீரோ பாணியில் ஃபேண்டசி திரைப்படமாக உருவாக்கப்பட்டது. விமர்சகர்கள் மற்றும் பார்வையாளர்களின் பாராட்டுகளை பெற்ற லோகா திரைப்படம், ஏறத்தாழ ரூ. 300 கோடி வசூலித்து சாதனை படைத்தது. மலையாளத்தில் இதுவரை வெளியான திரைப்படங்களிலேயே அதிகப்படியாக வசூலித்த திரைப்படமாக லோகா அமைந்தது என்று பலரும் கூறினர்.

மேலும் படிக்க: Actress Sunaina: நடிகை சுனைனாவின் காதலர் இவர் தானா? வைரலாகும் இன்ஸ்டாகிராம் பதிவு

இந்த சூழலில், துல்கர் சல்மான் தயாரிப்பில் வெளியானதால் காந்தா திரைப்படத்தின் மீது இயல்பாகவே ரசிகர்களின் எதிர்பார்ப்பு அதிகரித்தது. அதற்கு ஏற்றார் போல், இப்படத்தின் ட்ரெய்லரும் பலரை ஈர்க்கும் வகையில் இருந்தது. இதனால், பெரும் எதிர்பார்ப்புகளுக்கு இடையே காந்தா திரைப்படம் வெளியானது. ஆனால், துல்கர் சல்மானின் முந்தைய திரைப்படங்களான லக்கி பாஸ்கர், லோகா அளவிற்கு காந்தா திரைப்படத்திற்கு வரவேற்பு கிடைக்கவில்லை.

A masterpiece, a mentor and a murder. When pride turns into revenge, yaaru first break aava? 😮 pic.twitter.com/ZHwfHEvCD5

— Netflix India South (@Netflix_INSouth) December 8, 2025

குறிப்பாக, இப்படத்தின் ட்ரெய்லர் ஏற்படுத்திய எதிர்பார்ப்பை இப்படம் பூர்த்தி செய்யவில்லை என்று பலரும் கூறினர். ஆனால், படத்தில் நடித்திருந்த அனைவரும் சிறப்பான பங்களிப்பை அளித்தனர் என்று விமர்சகர்கள் மற்றும் பார்வையாளர்கள் தங்கள் பாராட்டுகளை தெரிவித்தனர். அதிலும் துல்கர் சல்மான் மற்றும் சமுத்திரக்கனி ஆகியோர் மாறுபட்ட நடிப்பை வெளிப்படுத்தியதாக கூறப்பட்டது. இதனால், காந்தா திரைப்படத்தின் ஓடிடி வெளியீட்டிற்காக ரசிகர்கள் காத்திருந்தனர். அதன்படி, ஓடிடி வெளியீட்டின் போது இப்படம் கவனத்தை ஈர்க்குமா என்ற கேள்வி தற்போது எழுந்துள்ளது.

இந்தக் கட்டுரை உங்களுக்குப் பிடித்திருந்தால், அதைப் பகிரவும் மேலும் இதே போன்ற பிற கட்டுரைகளைப் படிக்க Her Zindagi உடன் இணைந்திருங்கள்.

Image Credit: Twitter