Weight loss Recipe : உடல் எடை சட்டுனு குறைய ஓட்ஸ் அடை செய்து சாப்பிடுங்க

நீங்கள் உடல் எடையை குறைக்க விரும்பினால் ஒருபோதும் உங்கள் காலை உணவை தவிர்க்காதீர்கள். அன்றைய நாள் முழுவதும் நீங்கள் சுறுசுறுப்பாக ஆற்றலுடன் செயல்பட காலை உணவு மிகவும் அவசியமானது. காலை உணவை தவிர்ப்பது எடை இழப்புக்கு எந்த வகையிலும் உதவாது.

பரபரப்பான காலை நேரத்தில் காலை உணவை சீக்கிரம் சமைக்க வேண்டுமா? அதுவும் எடை இழப்புக்கு உதவக்கூடிய உணவாக இருக்க வேண்டுமா? இவ்விரண்டும் ஒன்று சேர அமைந்திருக்கும் இந்த எளிமையான ஓட்ஸ் அடை ரெசிபியை நீங்கள் முயற்சி செய்து பாருங்கள். ஓட்ஸ் கஞ்சி குடிக்க விருப்பம் இல்லாதவர்கள், ஓட்ஸை வைத்து இது போன்ற அடை செய்து சாப்பிடலாம். இதற்கான செய்முறையை இப்போது பார்க்கலாம்.

இந்த பதிவும் உதவலாம்: இரவு உணவுக்கு நல்லா புசுபுசுனு பஞ்சு மாதிரி ராகி பன் தோசை செய்து அசத்துங்க

தேவையான பொருட்கள்

• ரோல்டு ஓட்ஸ் - 1/2 கப்

• சின்ன வெங்காயம் 10-12

• கறிவேப்பிலை - சிறிதளவு

• ஓமம் - ¼ டீஸ்பூன்

• சீரகம் - ¼ டீஸ்பூன்

• மஞ்சள் பொடி - ½ டீஸ்பூன்

• மிளகு பொடி - ½ டீஸ்பூன்

• ஜீரக பொடி - ¼ டீஸ்பூன்

• இஞ்சி - சிறிய துண்டு

• தக்காளி - 1(சிறியது)

• கேரட் - 1(சிறியது)

• கொத்தமல்லி - சிறிதளவு

• தண்ணீர் - 2-3 டேபிள் ஸ்பூன்

• உப்பு - தேவையான அளவு

செய்முறை

• முதலில் ஓட்ஸை தண்ணீர் ஊற்றி 15 நிமிடம் ஊற வைக்கவும்.

• இப்போது ஒரு மிக்ஸர் ஜாரில் வெங்காயம், இஞ்சி, நறுக்கிய தக்காளி, கருவேப்பிலை, ஓமம், ஜீரகம், மஞ்சள் பொடி, மிளகு பொடி மற்றும் உப்பு சேர்த்து கொரகொரப்பாக அரைத்து தயாராக வைக்கவும்.

• 15 நிமிடங்கள் கழித்து ஊறவைத்த தண்ணீரை நீக்கிவிட்டு ஓட்ஸை மட்டும் வடித்து எடுத்துக் கொள்ளவும்.

• ஊறிய ஓட்ஸை கைகளால் நன்கு மசித்து கொள்ளவும்.

• ஊறிய ஓட்ஸுடன் அரைத்து வைத்துள்ள அடைக்கான மசாலாவை சேர்க்கவும்.

• நீங்கள் விரும்பினால் இதில் முட்டைகோஸ், கேப்சிகம், வெள்ளரிக்காய் போன்ற காய்கறிகளையும் சேர்த்துக் கொள்ளலாம்.

• அடை மாவில் பொடியாக நறுக்கிய பச்சை மிளகாய் சேர்க்கவும்.

• பின்னர் கால் டீஸ்பூன் சீரகப்பொடி மற்றும் நறுக்கிய கொத்தமல்லி இலைகளை சேர்க்கவும்.

• மாவுடன் இரண்டு டேபிள்ஸ்பூன் அளவிற்கு தண்ணீர் தெளித்து கெட்டியான அடை மாவு பதத்திற்கு ஒன்று சேர கலந்து கொள்ளவும்.

• இப்போது ஒரு தோசை கல்லை சூடாக்கி தயாராக வைத்துள்ள அடை மாவை ஈரமான கை அல்லது ஸ்பூனால் தட்டி கொள்ளவும்.

• நேரடியாக தோசை கல்லில் வைத்து தட்ட கடினமாக இருந்தால், ஈர துணி அல்லது வாழை இலையில் தட்டி தோசை கல்லின் மீது போடலாம்.

• அடையை மூடி இரண்டு நிமிடங்களுக்கு வேக விடவும். அடையை திருப்பிப் போட்டு மறுபுறமும் வேகவைத்து சுட்டெடுக்கவும்.

நார்ச்சத்து நிறைந்த இந்த ஓட்ஸ் காய்கறி அடை உங்கள் எடை இழப்புக்கு ஆன சிறந்த காலை உணவாக இருக்கும். உங்களுக்கு விருப்பமான காய்கறிகளை சேர்த்து இந்த ஓட்ஸ் அடை ரெசிபியை நீங்களும் முயற்சி செய்து பாருங்கள்.

இந்த பதிவும் உதவலாம்: நாவூறும் சுவையில் கேரளா ஸ்பெஷல் வாழை இலை மீன் வறுவல்

இந்த தகவல் உங்களுக்கு நிச்சயம் பயனுள்ளதாக இருந்திருக்குமென நம்புகிறோம். இந்த பதிவு பிறருக்கும் பயன்பெற இதனை பகிரலாமே. மேலும் லைக் செய்யவும், பதிவு குறித்த உங்கள் கருத்தினை கமெண்ட் செய்யவும். ஹெர்ஷிந்தகி தமிழ் பக்கத்தில் இணைவதன் மூலமாக தொடர்ந்து பயனுள்ள பதிவை காணலாம்.

image source:freepik