Pori Paniyaram : வீட்டில் பொரி இருக்கா? 10 நிமிஷத்துல காலை டிபன் செய்திடலாம்.

பணியாரத்தில் பல வகை உண்டு. இனிப்பு பணியாரம், கார பணியாரம், நெய் அப்பம், கோதுமை பணியாரம் என பல வகையான பணியாரங்களை நீங்கள் கேள்விப்பட்டு இருப்பீர்கள், பெரும்பாலானவற்றை நீங்கள் சாப்பிட்டும் இருப்பீர்கள். ஆனால் பொரியில் பணியாரம் செய்யலாம் என்பது உங்களுக்கு தெரியுமா?

பொரி ஆரோக்கியமான சிற்றுண்டி. வீட்டில் பொரி இருந்தால் ஒரு முறை இந்த பணியாரத்தை செய்து பாருங்கள். காலையில் அவசர அவசரமாக இட்லி தோசை மாவு இல்லாமல், என்ன டிபன் செய்வது என்று புரியாமல் குழம்பி தவிக்கும் பொழுது இந்த ரெசிபி கைகோடுக்கும். இந்த ஆரோக்கியமான பணியாரம் ரெசிபியை நீங்களும் கட்டாயம் முயற்சி செய்து பாருங்கள். இதற்கு தேவையான பொருட்கள் மற்றும் அதன் செய்முறையை இப்போது பார்க்கலாம்.

இந்த பதிவும் உதவலாம்: உடல் எடை வேகமாக குறைய இப்படி சூப் செய்து குடிங்க!

தேவையான பொருட்கள்

• பொரி - 1 கப்

• ரவை - ½ கப்

• வேகவைத்து மசித்த உருளை கிழங்கு - 4

• இஞ்சி - சிறிய துண்டு

• பச்சை மிளகாய் - 1

• எண்ணெய் - தேவையான அளவு

• கொத்தமல்லி - சிறிதளவு

• வெங்காயம் - 1

• கறிவேப்பிலை - சிறிதளவு

• கடுகு - 1 டீஸ்பூன்

• பெருங்காயம் - ½ டீஸ்பூன்

• கடலை பருப்பு - 1 டீஸ்பூன்

• உப்பு - தேவையான அளவு

செய்முறை

• முதலில் வெங்காயம், பச்சை மிளகாய், இஞ்சி, கொத்தமல்லி, கருவேப்பிலை ஆகியவற்றை நல்ல பொடியாக நறுக்கிக் கொள்ளவும்.

• பொரியை 5 நிமிடங்கள் தண்ணீரில் ஊறவைத்து பின்பு வடிகட்டிக் கொள்ளவும்.

• ஒரு மிக்ஸர் ஜாரில் ரவை சேர்த்து பொடித்துக் கொள்ளவும். இதனுடன் ஊற வைத்த பொரி சேர்த்து நன்கு அரைத்துக் கொள்ளவும். இது தோசை மாவு பதத்திற்கு இருக்க வேண்டும்.

• இதனுடன் வேக வைத்து மசித்த உருளைக்கிழங்கு, நறுக்கிய காய்கறிகள் சேர்த்து நன்கு கலக்கவும்.

• ஒரு கடாயில் எண்ணெய் ஊற்றி கடுகு கடலைப்பருப்பு, கருவேப்பிலை பெருங்காயம் சேர்த்து தாளிக்கவும். இதை பணியாரம் மாவுடன் சேர்த்து நன்கு கலக்கவும்.

• தேவையான அளவு உப்பு மற்றும் நறுக்கிய கொத்தமல்லி சேர்த்து கலந்து கொள்ளவும்.

• பணியார கல்லை சூடாக்கி சிறிதளவு எண்ணெய் ஊற்றவும். தயாராக வைத்துள்ள மாவை ஊற்றி இருபுறமும் பொன்னிறமாகும் வரை சுட்டெடுக்கவும்.

• இதை தேங்காய் சட்னி சாம்பார் அல்லது புதினா சட்னியுடன் பரிமாறலாம்.

இந்த பதிவும் உதவலாம்: இதை விட ஹெல்த்தியான ஒரு பரோட்டாவை செய்யவே முடியாது!

இந்த தகவல் உங்களுக்கு நிச்சயம் பயனுள்ளதாக இருந்திருக்குமென நம்புகிறோம். இந்த பதிவு பிறருக்கும் பயன்பெற இதனை பகிரலாமே. மேலும் ஹெர்ஷிந்தகி தமிழ் பக்கத்தில் இணைவதன் மூலமாக தொடர்ந்து பயனுள்ள பதிவை காணலாம்.

image source:freepik