Beetroot Parotta : இதை விட ஹெல்த்தியான ஒரு பரோட்டாவை செய்யவே முடியாது!

பொதுவாக பரோட்டாக்கள் என்றாலே அது ஆரோக்கியமற்றதாகவே பார்க்கப்படுகிறது. மைதாவை மூலமாக கொண்டு தயாரிக்கப்படும் பரோட்டாக்களில் ஒரு சில உணவகங்கள் டால்டா போன்ற ஆரோக்கியமற்ற விஷயங்களை சேர்க்கிறார்கள். குழந்தைகளுக்கு இது போன்ற உணவுகளை பழக்கப்படுத்தாமல் வீட்டிலேயே ஆரோக்கியமான முறையில் பரோட்டாக்கள் செய்து கொடுக்கலாம்.

பீட்ரூட் ஒரு சிறந்த ஆரோக்கியமான காய்கறி. இரத்த அழுத்தத்தை கட்டுக்குள் வைத்திருப்பது முதல் புற்றுநோயை தடுப்பது வரை பீட்ரூட்டில் ஏராளமான ஆரோக்கிய நன்மைகள் நிறைந்துள்ளன. இந்த ஆரோக்கியமான காய்கறியை கொண்டு சுவை மிகுந்த சத்தான ஒரு உணவை தயாரிக்கலாம். குழந்தைகள் முதல் பெரியவர்கள் வரை அனைவரும் இந்த பரோட்டாவை விரும்பி சாப்பிடுவார்கள். பீட்ரூட் பரோட்டா செய்வதற்கு தேவையான பொருட்கள் மற்றும் அதன் செய்முறையை இப்போது பார்க்கலாம்.

இந்த பதிவும் உதவலாம்:ஈஸியா எடையை குறைக்கணுமா? இந்த மாதிரி இஞ்சி டீ போட்டு குடிங்க!

தேவையான பொருட்கள்

• பீட்ரூட் - 2

• கோதுமை மாவு - 2 கப்

• உப்பு - தேவையான அளவு

• எண்ணெய் - தேவையான அளவு

• மஞ்சள் தூள் - ¼ டீஸ்பூன்

• மிளகாய் தூள் - 1 டீஸ்பூன்

• ஓமம் - 1 டீஸ்பூன்

• கொத்துமல்லி இலை - சிறிதளவு

• வேகவைத்த உருளைக்கிழங்கு - 1

• தண்ணீர் - தேவையான அளவு

செய்முறை

• முதலில் பீட்ரூட்டை தோல் நீக்கி துருவி தயாராக வைக்கவும்.

• அடுத்ததாக ஒரு கடாயில் சிறிதளவு எண்ணெய் ஊற்றி துருவிய பீட்ரூட் மற்றும் சிறிதளவு உப்பு சேர்த்து 5 நிமிடங்களுக்கு வதக்கிக் கொள்ளவும்.

• பின்னர் ஒரு அகண்ட பாத்திரத்தில் கோதுமை மாவு, உப்பு, மஞ்சள் தூள், ஓமம் மற்றும் மிளகாய் தூள் சேர்த்து நன்கு கலக்கவும்.

• இதனுடன் வதக்கிய பீட்ரூட், வேக வைத்து மசித்த உருளைக்கிழங்கு மற்றும் நறுக்கிய கொத்தமல்லி இலைகள் சேர்த்து நன்கு கலக்கவும்.

• எல்லாம் ஒன்று சேர நன்கு கலந்தவுடன், கொஞ்சம் கொஞ்சமாக தண்ணீர் சேர்த்து சப்பாத்தி மாவு பதத்திற்கு பிசைந்து கொள்ளவும்.

• மாவை 15 நிமிடங்களுக்கு ஊற வைக்கவும். பிறகு சப்பாத்தியாகவோ அல்லது பரோட்டாவாகவோ சுட்டெடுக்கலாம்.

• இந்த ஆரோக்கியமான பீட்ரூட் பரோட்டாவை நீங்களும் உங்களுடைய வீட்டில் முயற்சி செய்து பாருங்கள். வீட்டில் உள்ளவர்களுக்கு ஆரோக்கியமான உணவை சமைத்துக் கொடுத்த திருப்தி நிச்சயமாக உங்களுக்கு இருக்கும்.

இந்த பதிவும் உதவலாம்: குறைந்த இரத்த அழுத்த பிரச்சனையா? இந்த ஸ்மூத்திகளை ட்ரை பண்ணுங்க!

இந்த தகவல் உங்களுக்கு நிச்சயம் பயனுள்ளதாக இருந்திருக்குமென நம்புகிறோம். இந்த பதிவு பிறருக்கும் பயன்பெற இதனை பகிரலாமே. மேலும் ஹெர்ஷிந்தகி தமிழ் பக்கத்தில் இணைவதன் மூலமாக தொடர்ந்து பயனுள்ள பதிவை காணலாம்.

image source:freepik