வேற லெவல் சுவையில் கர்நாடகா முளுபாகல் நெய் தோசை! ருசியோ ருசி...

ஆரோக்கியம் நிறைந்த உணவு செய்முறையில் நாம் தமிழகத்தை கடந்து அண்டை மாநிலங்களான ஆந்திரா, கேரளா, கர்நாடகாவின் பாரம்பரிய உணவுகளை பகிர்ந்துள்ளோம். இந்தியாவின் ஒவ்வொரு 100 கிலோ மீட்டருக்கும் உணவுமுறை வேறுபடும் என்பது உண்மையே. அந்த வகையில் கர்நாடகாவில் பிரபலமான முளுபாகல் நெய் தோசை செய்முறையைப் பற்றி பார்ப்போம். ஆந்திரா - கர்நாடகா மாநிலங்களின் எல்லையான கோலார் மாவட்டத்தில் அமைந்துள்ள முளுபாகல் டவுனில் இந்த தோசை கண்டுபிடிக்கப்பட்டதாக கூறப்படுகிறது. தோசையில் நெய் ஊற்றி மிளகாய் சட்னி தடவி உருளைக்கிழங்கு மசியல் வைத்து வேக விட்டு சாப்பிடும் போது ருசி லெவலில் இருக்கும்.

முளுபாகல் தோசை செய்யத் தேவையானவை

• உளுந்த பருப்பு
• இட்லி அரிசி
• ஜவ்வரிசி
• கடலைப் பருப்பு
• வெந்தயம்
• அவல்
• தண்ணீர்
• பச்சை மிளகாய்
• காஷ்மீரி மிளகாய்
• உப்பு
• சர்க்கரை
• கறிவேப்பிலை
• வெங்காயம்
• பொட்டுக் கடலை
• சீரகம்

முளுபாகல் தோசை செய்முறை

• தரமான உளுத்தம் பருப்பு அரை கப், இட்லி அரிசி ஒரு கப், ஜவ்வரிசி ஐந்து ஸ்பூன், கடலைப் பருப்பு ஒன்றரை ஸ்பூன், வெந்தயம் அரை டீஸ்பூன், அவல் கால் கப்... இவை அனைத்தையும் ஒன்று சேர்த்து தண்ணீரில் இரண்டு முறை நன்கு கழுவவும்.
• இதன் பிறகு தண்ணீர் ஊற்றி சுமார் எட்டு மணி நேரம் ஊற வைக்கவும். இப்போது கிரைண்டரில் அரைத்து ஒரு முறை கலந்து விட்டு மீண்டும் எட்டு மணி நேரத்திற்கு ஊறவிட்டால் முளுபாகல் தோசை மாவு ரெடி.
• இதனுடன் தேவையான அளவு உப்பு மற்றும் ஒரு டீஸ்பூன் சர்க்கரை சேர்க்கவும்.
• அடுத்ததாக மிளகாய் சட்னி செய்வதற்கு சுடு தண்ணீரில் பத்து காஷ்மீரி மிளகாயை ஊற வைக்கவும்.
• இதை மிக்ஸியில் போட்டு பாதி பெரிய வெங்காயம், இரண்டு டீஸ்பூன் பொட்டுக் கடலை, இரண்டு ஸ்பூன் புளி தண்ணீர், கொஞ்சம் உப்பு, அரை ஸ்பூன் சீரகம் சேர்த்து அரைத்தால் மிளகாய் சட்னி ரெடி.
• பாத்திரத்தில் இரண்டு ஸ்பூன் நல்லெண்ணெய் ஊற்றி கொஞ்சம் கடுகு, உளுந்த பருப்பு போட்டு, ஒரு பெரிய வெங்காயம், கொஞ்சம் கறிவேப்பிலை, பொடிதாக நறுக்கிய பச்சை மிளகாய் சேர்த்து வதக்கவும்.
• அடுத்ததாக வேகவைத்த நான்கு மீடியம் சைஸ் உருளைக்கிழங்கு போட்டு கொஞ்சமாக தண்ணீர் சேர்த்து வறுக்கவும். கொத்தமல்லியும் போடுங்கள்.
• சாதாரண தோசை கல்-ல் முளுபாகல் தோசையை சுட முடியாது. வட்டமான பேன் எடுத்து அதில் மாவை ஊற்றுங்கள். ஆப்பம் போல பேனில் மாவை ஊற்றவும்.
• 20 விநாடிகளுக்கு பிறகு தோசையை சுற்றி நெய் ஊற்றி வேக வைக்கவும்.
• தோசை 70 விழுக்காடு வெந்த பிறகு மிளகாய் சட்னியை தடவவும். இதையடுத்து உருளைக்கிழங்கு மசியலை போட்டு தோசையை பாதியாக மூடி வேக வைக்கவும்.
• இதை மசாலா தோசை என நினைக்க வேண்டாம். செய்முறையிலும், சுவையிலும் முளுபாகல் தோசை வித்தியாசமானது.

இதுபோன்ற கட்டுரைகளுக்கு ஹெர் ஜிந்தகியுடன் தொடர்ந்து இணைந்திருங்கள்.