GOAT Review : கமர்ஷியல் கிங் என நிரூபித்த விஜய்! "கோட்" ரசிகர்களுக்கான ட்ரீட்... லாஜிக்கில் சொதப்பிய வெங்கட் பிரபு...

விநாயகர் சதுர்த்தி கொண்டாட்டத்தையொட்டி வெளியான நடிகர் விஜய்யின் கோட் திரைப்படம் அவரது ரசிகர்களுக்கும், கமர்சியல் சினிமாவை விரும்பும் நபர்களுக்கும் பிடித்ததாக அமைந்துள்ளது. ஏறக்குறைய தமிழகத்தின் அனைத்து திரையரங்குகளிலும் வெளியான கோட் வசூலிலும் சாதனை புரிந்துள்ளது. வெங்கட் பிரபு இயக்கத்தில் விஜய் நடித்துள்ள தி கிரேடஸ்டட் ஆஃப் ஆல் டைம் “கோட்” படத்தின் விமர்சனத்தை பார்க்கலாம். ஜெயராம், பிரஷாந்த், மோகன், பிரபுதேவா, அஜ்மல், சினேகா, மீனாட்சி செளத்ரி, லைலா, வைபவ், அரவிந்த் ஆகாஷ், யோகி பாபு, பார்வதி நாயர், கனிகா, சிறப்பு தோற்றத்தில் சிவகார்த்திகேயன், திரிஷா என பெரும் பட்டாளம் கோட் படத்தில் நடித்துள்ளது.

கதைச் சுருக்கம்

பெற்றெடுத்த தந்தை செய்த தவறினால் வளர்ப்பு தந்தை சொல்வதை கேட்டு இளம் விஜய் வளர்கிறார். வளர்ப்பு தந்தையின் தூண்டுதலால் பெற்றெடுத்த தந்தையை கொலை செய்ய நினைக்கிறார். மகனின் திட்டங்களை எவ்வாறு தளபதி (தந்தை) விஜய் எப்படி முறியடிக்கிறார் என்பதே கதை.

படத்தின் பாஸிட்டிவ்ஸ்

• பல படங்களுக்கு பிறகு விஜய் முழு கமர்ஷியல் சினிமாவில் நடித்து ரசிகர்களை திருப்தி அடையச் செய்திருக்கிறார். இந்த படத்தை முழுவதும் தோளில் சுமப்பது விஜய் தான். ஆக்‌ஷன், காமெடி, காதல், நடனம் என அனைத்திலும் ஸ்கோர் செய்துள்ளார்.
• தந்தை விஜய்யின் கதாபாத்திரம் வலுவாக அமைக்கப்பட்டுள்ளது. தளபதி, இளைய தளபதி கதாபாத்திரங்களுக்கு வேறுபாட்டை காண்பிக்க விஜய் மிகவும் கஷ்டப்பட்டு இருக்கிறார். அது நன்கு வர்க் அவுட் ஆகி இருக்கிறது.
• படத்தின் டெக்னிக்கல் டீம் கொடுத்த உழைப்பினால் இளைய தளபதியையும், கேப்டன் விஜயகாந்த்தையும் பொதுமக்கள் ரசித்து பார்த்தனர்.
• பிரசாந்த், பிரபுதேவா, ஜெயராம் தங்களுக்கு கொடுக்கப்பட்ட கதாபாத்திரங்களில் கட்சிதமாக நடித்துள்ளனர்.
• முதல் பாதியில் விஜய், சினேகாவின் காட்சிகள் விருந்தாக இருந்தது. அடுத்து என்ன நடக்கும் என எளிதில் சிந்திக்க முடிந்தாலும் அதை வெங்கட் பிரபு திரையில் புதிதாக காட்சிப்படுத்த முயற்சித்திருக்கிறார்.
• யுவன் சங்கர் ராஜா பின்னணி இசையில் மிரட்டியுள்ளார். மட்ட பாடலுக்கு பெரும்பாலான ரசிகர்கள் குத்தாட்டம் போட்டனர்.  

படத்தின் நெகட்டிவ்ஸ்

• வெங்கட் பிரபு நினைத்திருந்தால் படத்தில் சுமார் 20 நிமிட காட்சிகளை நீக்கி இருக்கலாம். 3 மணி நேர நீளம் படத்திற்கு பாதமாக அமைந்துவிட்டது. விசில் போடு மற்றும் ஸ்பார்க் பாடல்கள் படத்திற்கு தேவையற்றதாக தெரிந்தது. விஜய் படம் என்றாலே ஓபனிங் சாங் மாஸாக இருக்கும். விசில் போடு பாடல் சுத்தமாக எடுபடவில்லை.
• இரண்டாம் பாதி முழுக்க எலி - பூனை விளையாட்டு என்பதால் அதை இன்னும் சுவாரஸ்யமாக சொல்லி இருக்கலாம். மோகன் வலுவான வில்லன் கதாபாத்திரத்திற்கு செட் ஆகவில்லை. ஆரம்பக்காட்சியில் மோகனை இந்திய அரசு தீவிரமாக தேடுகிறது என செய்திக்காட்சி உள்ளது. ஆனால் அவர் ஹார்பர் வழியாக சென்னைக்குள் நுழைகிறார். தேச துரோகியை அடையாளம் காண்பது கடினம் என வெங்கட் பிரபு நினைத்துவிட்டார் போல...
• படத்தில் கதாபாத்திரங்களின் எண்ணிக்கையை குறைத்திருக்கலாம். யோகி பாபு, பார்வதி நாயர், விடிவி கணேஷ், பிரேம்ஜி ஆகியோர் படத்தில் எந்த தாக்கத்தையும் ஏற்படுத்தவில்லை.
• சென்னை போன்ற மாநகரில் ஒரு பொது இடத்தை அசால்ட்டாக தீவிரவாதிகள் கட்டுக்குள் வைத்திருக்கின்றனர். வெங்கட் பிரபு இதை நம்பும்படி காட்சிப்படுத்தி இருக்கலாம்.

படத்தின் கிரிக்கெட் காட்சிகள் ஐபிஎல் ரசிகர்களால் விமர்சனத்திற்கு ஆளாகியுள்ளது. முதலில் 43 லீக் மேட்ச் என காட்டப்படுகிறது. அதன் பிறகு ஐபிஎல் லீக் 2024, 2023 என பழைய சீசன் ஸ்கோர் கார்டு மற்றும் வீடியோவை தப்புத் தப்பாக ஒட்டி வெட்டியுள்ளனர். வர்ணனையில் அரையிறுதிபோட்டி நடைபெறுகிறது என மீண்டும் குழப்புகின்றனர். மும்பை இந்தியன்ஸுக்கு ஹர்திக் பாண்ட்யா கேப்டன். ஆனால் ரோகித் சர்மாவை காண்பிக்கின்றனர். தோனி 2022ல் ஜெய்தேவ் உனட்கட் வீசிய பந்தை சிக்ஸருக்கு விரட்டும் காட்சியும், 2024ல் ஹர்திக் பாண்ட்யா வீசிய பந்தை சிக்ஸருக்கு பறக்கவிடும் காட்சியும்  தவறாக ஒட்டி இணைத்துள்ளனர். வீரர்கள் அறையிலேயே வெடிகுண்டு வைக்கமுடியும் என்பது மிகப்பெரிய சொதப்பல்.

இரண்டாம் பாகத்திற்கான லீட் தேவையற்ற வேலை...

வலுவான திரைக்கதை இல்லை என்றாலும் கோட் மிகவும் ரசிக்கும்படி உள்ளது. தெறி படத்திற்கு பிறகு விஜய் நல்ல கமர்ஷியல் படத்தில் நடித்துள்ளார்.

ரேட்டிங் - 3.5/5