Jackfruit kesari : நாவில் கரையும் அட்டகாசமான பலாப்பழ கேசரி, ஒரு முறை செஞ்சு பாருங்க!

பொதுவாக வீட்டு விசேஷங்கள், பூஜைகளுக்கு சுலபமாக செய்யக்கூடியது கேசரி. வீட்டில் ரவை, சர்க்கரை இருந்தால் போதும் 10 நிமிஷத்தில் கேசரி செய்து விடலாம். கேசரி சரியான பக்குவத்தில் வர ஒரு சில விஷயங்களை பின்பற்றினால் போதும். கேசரி சரியான பக்குவத்தில் செய்வதற்கான டிப்ஸ் மற்றும் பலாப்பழ கேசரியின் செய்முறையை இன்றைய பதிவில் பார்க்கலாம்.

கேசரி செய்ய டிப்ஸ்

• கேசரி சுவையாக வருவதற்கு தரமான நெய்யை பயன்படுத்த வேண்டும்.

• அடுத்ததாக ரவையை நெய்யில் நன்கு வறுக்க வேண்டும். குறைந்தது 2-3 நிமிடங்களாவது வறுக்க வேண்டும்.

• கேசரி செய்யும் பொழுது தண்ணீர் சர்க்கரை, ரவை ஆகியவற்றை ஒன்றாக சேர்த்து விடக் கூடாது. ரவை நன்கு வறுபட்டவுடன் கொதிக்கும் நீரை அதில் சேர்க்க வேண்டும். கொதிக்கும் நீரை சேர்த்தால் மட்டுமே ரவை சரியான பக்குவத்தில் வெந்து வரும். பச்சை தண்ணீர் சேர்க்கக்கூடாது.

• மிக முக்கியமாக ரவை முழுவதுமாக வெந்த பிறகு தான் சர்க்கரையை சேர்க்க வேண்டும்.

இந்த பதிவும் உதவலாம்: உண்ணும் உணவே மருந்து, பல நோய்கள் தீர இந்த ஒரு குழம்பு மட்டுமே போதும்!

இந்த குறிப்புகளை எல்லாம் நீங்கள் பின்பற்றினால் கேசரி எப்போது செய்தாலும் பெர்ஃபெக்ட்டாக வரும். இப்போது பலாப்பழ கேசரி செய்ய தேவையான பொருட்கள் மற்றும் அதன் செய்முறையை பார்க்கலாம்.

தேவையான பொருட்கள்

• பலாப்பழ சுளை - 15

• நெய் - 4 டேபிள் ஸ்பூன்

• முந்திரி பருப்பு - சிறிதளவு

• உலர் திராட்சை - சிறிதளவு

• ரவை - ½ கப்

• தண்ணீர் - 2 கப்

• ஏலக்காய் பொடி - 1 டீஸ்பூன்

• குங்குமப்பூ தண்ணீர் - 1 டேபிள் ஸ்பூன்

• சர்க்கரை - 1 கப்

செய்முறை

• முதலில் பலாப்பழத்தை கழுவி சுத்தம் செய்து கொள்ளவும்.

• பலாப்பழத்தின் விதையை நீக்கிவிட்டு சிறிய துண்டுகளாக நறுக்கிக் கொள்ளவும்.

• நறுக்கிய பலாப்பழத்தின் ஒரு பகுதியை மிக்சர் ஜாரில் சேர்த்து விழுதாக அரைத்துக் கொள்ளவும்.

• இப்போது ஒரு கடாயில் முந்திரியை சேர்த்து வறுக்கவும். இதனை தனியாக எடுத்துவைக்கவும்.

• அடுத்ததாக உலர் திராட்சையையும் வறுத்து தனியாக வைக்கவும்.

• பின்னர் அதே கடாயில் ரவையை சேர்த்து 2-3 நிமிடங்களுக்கு வறுத்துக் கொள்ளவும். இதனுடன் அரைத்த பலாப்பழ விழுது மற்றும் கொஞ்சமாக நெய் சேர்த்துக் கொள்ளவும்.

• பின் நறுக்கிய பலாப்பழத்தை சேர்க்கவும்.

• இப்போது ஒரு பாத்திரத்தில் ஒரு கப் தண்ணீர் சேர்த்து கொதிக்க விடவும். இதனை வறுத்த ரவை மற்றும் பலாப்பழ கலவையில் சேர்க்கவும்.

• இதனுடன் குங்குமப்பூ நீர் மற்றும் ஏலக்காய் பொடி சேர்த்து கிளறவும். குங்குமப்பூ இல்லாதவர்கள் நிறத்திற்காக ஒரு சிட்டிகை மஞ்சள் போடி சேர்த்துக்கொள்ளலாம்.

• ரவை முழுவதுமாக வெந்த பிறகு ஒரு கப் சர்க்கரை சேர்த்துக் கொள்ளவும். இப்போது மீதமுள்ள நெய்யை சேர்க்கவும்.

• கடைசியாக வறுத்த முந்திரி மற்றும் உலர் திராட்சை சேர்த்து நன்கு கலந்து அடுப்பை அணைக்கவும்.

• சுவையான இந்த பலாப்பழ கேசரியை நீங்களும் செய்து சுவைத்து மகிழுங்கள்.

இந்த பதிவும் உதவலாம்: வாயில் போட்ட உடனே கரைந்து விடும், கோடைக்கு ஏற்ற சத்தான ராகி கஸ்டர்டு ரெசிபி!

இந்த தகவல் உங்களுக்கு நிச்சயம் பயனுள்ளதாக இருந்திருக்குமென நம்புகிறோம். இந்த பதிவு பிறருக்கும் பயன்பெற இதனை பகிரலாமே. மேலும் ஹெர்ஷிந்தகி தமிழ் பக்கத்தில் இணைவதன் மூலமாக தொடர்ந்து பயனுள்ள பதிவை காணலாம்.

image source:freepik