சப்பாத்திக்கு ஏற்ற சூப்பரான குடைமிளகாய் குருமா!!!

80ஸ் கிட்ஸ்களுக்கு பிடித்தமான உணவு பட்டியலில் சப்பாத்தியும் குருமாவும் ஒன்று. பெரும்பாலான வீடுகளில் அம்மாக்கள் வாரத்தில் ஒரு நாள் இட்லி, தோசை அல்லது சப்பாத்திக்கு குருமா செய்வதை வழக்கமாக வைத்திருப்பார்கள். அதற்கு காரணம், அதிலிருக்கும் ஆரோக்கியம் தான். எல்லா வகையான காய்கறிகளுடன் இஞ்சி, பூண்டு, பட்டை போன்ற மசாலா பொருட்களும் சேர்ந்து இருப்பதால், உடலுக்கு பலவகையான ஊட்டச்சத்துக்கள் ஒரே நேரத்தில் கிடைக்கும்.

அதே போல் சப்பாத்திக்கு பல வகையான சைடிஷ்கள் இருந்தாலும் நம்ம ஊர் குருமாதான் எவர்கிரீன் சைடிஷாக உள்ளது. குருமாவில் பலவகையுண்டு. வெஜ் குருமா, பிளைன் குருமா, தண்ணீர் குருமா, பட்டாணி குருமா, குடை மிளகாய் குருமா, கறி குருமா என இப்படி சொல்லிக்கொண்டே போகலாம். இதில் குடைமிளகாய் குருமாவின் ருசி சற்று வித்தியாசமாக இருக்கும். நிறைய காய்கறிகளும் இருக்காது. குழந்தைகளும் அதிகம் விரும்புவார்கள். வெறும் சப்பாத்திக்கு மட்டுமல்லாமல், பூரி, இட்லி, தோசை என எல்லா டிபன் வகைகளுக்கும் குடைமிளகாய் குருமா பொருத்தமாக இருக்கும்.

வாருங்கள், இப்போது அதன் செய்முறையை பார்ப்போம்.

தேவையான பொருட்கள்

• குடை மிளகாய் - 2

• வெங்காயம் - 2

• தக்காளி - 3

• இஞ்சி பூண்டு விழுது - 1 டீஸ்பூன்

• தேங்காய் - 1 டீஸ்பூன்

• முந்திரி - சிறிதளவு

• பூண்டு - 5 முதல் 6

• பச்சை மிளகாய் – 5

• சோம்பு – 1 டீஸ்பூன்

• சிவப்பு மிளகாய் தூள் - 1 டீஸ்பூன்

• உப்பு – தேவையான அளவு

• கறிவேப்பிலை - சிறிதளவு

செய்முறை

• முதலில் தேங்காய், சோம்பு, முந்திரி, பூண்டு, ஆகியவற்றை மிக்ஸியில் நன்கு அரைத்து பேஸ்ட் போல் எடுத்து கொள்ளவும்.

• பின்பு, அடுப்பில் கடாயை வைத்து அதில் எண்ணெய் ஊற்றி சூடானதும், நறுக்கிய வெங்காயம், பச்சை மிளகாய், கறிவேப்பிலை சேர்த்து நன்கு வதக்கவும்.

• இப்போது அதில் இஞ்சி பூண்டு விழுது சேர்த்து பச்சை வாசனை போகும் வரை வதக்கவும்.

• பின்பு அதில் நறுக்கிய தக்காளி, மிளகாய் தூள், குடை மிளகாய் சேர்த்து தேவையான அளவு உப்பும் சேர்த்து வேக விடவும்.

• இப்போது, கிரேவி எண்ணெய் பிரிந்து வதங்கி வந்ததும், அதில் அரைத்து வைத்துள்ள தேங்காய் கலவையை சேர்த்து நன்கு கலந்து விடவும்.

• தேவைப்பட்டால் சிறிதளவு தண்ணீரும் சேர்க்கலாம். குருமா நன்கு கெட்டி பதத்திற்கு வந்ததும், அடுப்பை அணைக்கவும்.

• அட்டகாசமான குடைமிளகாய் குருமா தயார்.

இந்த பதிவும் உதவலாம்: ருசியோ ருசி! மதுரை ஸ்பெஷல் பன் பரோட்டா

நீங்களும், இந்த செய்முறையை பின்பற்றி குடைமிளகாய் குருமா செய்து பாருங்கள். குழந்தைகள் விரும்பி சாப்பிடுவார்கள். இந்த தகவல் உங்களுக்கு நிச்சயம் பயனுள்ளதாக இருந்திருக்குமென நம்புகிறோம். இந்த பதிவு பிறருக்கும் பயன்பெற இதனை பகிரலாமே. மேலும் லைக் செய்யவும். ஹெர்ஷிந்தகி தமிழ் பக்கத்தில் இணைவதன் மூலமாக தொடர்ந்து பயனுள்ள பதிவை காணலாம்.

Images Credit: freepik