பெருசு விமர்சனம் : பெருசா சொல்றதுக்கு ஒன்னுமில்லை; வைபவுக்கு என்ன ஆச்சு ?

இளங்கோ ராம் இயக்கத்தில் வைபவ், அண்ணன் சுனில் நடித்துள்ள திரைப்படம் பெருசு. இப்படத்தின் ஒரிஜினல் வெர்ஷன் இலங்கை படத்தை இளங்கோ ராம் இயக்கியிருந்தார். எனவே பெருசு படம் ரீமேக் கதையாகும். இலங்கை பதிப்பு சர்வதேச திரைப்பட விழாக்களில் விருதுகளை வென்றிருந்தது. தீபா ஷங்கர், பால சரவணன், சந்தினி தமிழரசன், நிஹாரிகா, கிங்ஸ்லி, விடிவி கணேஷ், முனீஷ்காந்த், விடிவி கணேஷ், லொள்ளு சபா சுவாமிநாதன் மற்றும் பல நட்சத்திரங்கள் நடித்துள்ளனர். ட்ரெய்லர் பார்த்த பலருக்கும் இது ஒரு 18+ படம் என தெரிந்திருக்கும். பெருசு படத்தின் விமசர்னத்தை இந்த பதிவில் பார்க்கலாம். 

பெருசு கதை சுருக்கம்

ஊரில் மிகப்பெரிய ஆளாக கருதப்படும் வைபவின் அப்பா இறந்துவிடுகிறார். அவருடைய இறப்பின் போது யாரும் எதிர்பாராத விஷயம்  ஒன்று எழுந்துவிடுகிறது. அண்ணன் சுனிலும், தம்பி வைபவும் அப்பிரச்னையை எப்படி சமாளித்து தந்தையின் உடலை அடக்கம் செய்கின்றனர் என்பதே பெருசு படத்தின் கதை. 

பெருசு விமர்சனம் 

ஊருக்குள் கெளரவமாக சுற்றித் திரியும் வைபவின் அப்பா இயற்கை மரணம் எய்துகிறார். உறவினர்களுக்கு தகவல் சொல்லி வழக்கமான சம்பிரதாயங்களை மேற்கொள்ளலாம் என நினைக்கும் போது சிக்கல் ஒன்று எழுந்துவிடுகிறது. மருத்துவரை அழைத்து வந்தும் சிக்கல் இயல்பு நிலைக்கு திரும்பிய பாடில்லை. தந்தையின் மானத்தை காக்க யாருக்கும் தெரியாமல் பெரிய விஷயத்தை மூடி மறைத்து சம்பிரதாயங்களை ஆரம்பிக்கின்றனர். இறுதியில் உறவினர்களுக்கும், அக்கம்பக்கத்தினருக்கும் பெரிய சந்தேகம் ஏற்பட்டு விடுகிறது. மானம் போகக்கூடிய பெரிய பிரச்னையை இருவரும் சமாளித்தார்களா ? இல்லையா ? என்பதே கிளைமேக்ஸ்.

பெருசு படத்தின் பாஸிட்டிவ்ஸ்

• வைபவை விட சுனில் கதாபாத்திரத்திற்கே அதிக முக்கியத்துவம். டாக்டர், ஜெயிலர் படங்களை போல இயல்பான நடிப்பை திரையில் பிரதிபலித்திருக்கிறார்.
• தொடக்கத்திலேயே நேரடியாக கதைக்குள் சென்று ஆர்வத்தை தூண்டிய முயற்சி இறுதிவரை தாக்குப் பிடிக்கிறது. 
• 10 காமெடி காட்சிகளில் 3-4  சிரிப்பை வரவழைக்கின்றன. 
• ஒரு சில காட்சிகள் மகளிர் மட்டும் படத்தில் நாகேஷ் காட்சிகளை நினைவுப்படுத்தினாலும் அவை ரசிக்கும்படியாகவே இருந்தன.
• சுடுகாட்டில் பிணங்களை எரிக்கும் போது உடல் எழுந்து நிற்பதை பார்த்திருப்போம். உயிரிழப்பின் போது இப்படி பெரிய சிக்கல் எழும் என்று யாரும் அறியாத விஷயத்தை சொல்லியுள்ளனர். 

பெருசு படத்தின் நெகட்டிவ்ஸ்

• வைபவ் இப்படத்தில் துணை நடிகர் போலவே தோன்றுகிறார். தந்தை இறந்துவிட்டார் என்ற துயரம் வைபவ், சுனிலிடம் தெரியவில்லை. இருவரும் கதைக்குள் ஒன்றாத வகையில் கதாபாத்திரம் வடிவமைத்ததே காரணமாகும்.
• அருண் ராஜின் பாடல்கள் எதுவும் மனதில் ஒட்டவில்லை. 
• இதே படத்தை மலையாளத்தில் எடுத்திருந்தால் படத்தின் நீளத்தையும், காட்சிகளையும் அளவுகோளில் வைத்திருப்பார்கள். இது ஹாலிவுட் போல ஒன்றரை மணி நேரத்தில் சொல்லி முடிக்க வேண்டிய படம். 

ரேட்டிங் - 2.5 / 5

மேயாத மான் படத்திற்கு பிறகு வைபவிற்கு என்ன ஆனது என தெரியவில்லை. கதை தேர்வில் கவனம் செலுத்தினால் ரசிகர்களுக்கு பிடிக்க வாய்ப்புள்ளது. 

மேலும் படிங்க  ஸ்வீட்ஹார்ட் விமர்சனம் : ரியோ ராஜ் நடித்துள்ள புதிய படம் எப்படி இருக்கு ?