Hanumanasana Benefits : இதய நோய்களில் இருந்து விடுபட ஹனுமனாசனம் செய்யுங்கள்!

உடல் நலனும் யோகாவும் என்ற தொடரில் நாம் அடுத்ததாக பார்க்கப் போகும் ஆசனம் ஹனுமன் ஆசனம். இது ஆங்கிலத்தில் Monkey pose என்று அழைக்கப்படுகிறது. ஹனுமனாசனம் செய்வதற்கு மிகுந்த பொறுமையும் கவனமும் தேவை. நன்கு பயிற்சி செய்தால் மட்டுமே இந்த ஆசனத்தை செய்ய முடியும்.

இந்த ஆசனத்திற்கு இரண்டு தளர்வு பயிற்சிகள் உள்ளன. முதலில் கோ கோ விளையாட்டில் வீரர்கள் உட்காருவது போல உட்கார்ந்து வலது காலை கொஞ்சம் முன்னே வைத்து இடது காலை தூரமாக வைக்கவும். அதன் பிறகு வலது காலை நன்கு மடக்கவும்.

அடுத்ததாக கைகளை வலது மூட்டில் வைத்து அழுத்தி முன்னும் பின்னும் செல்லவும். பத்து முறை இதை செய்த பிறகு கால்களை மாற்றி இதே போல செய்யவும். தற்போது வஜ்ராசனம் நிலைக்கு வந்து ஆழ்ந்த மூச்சை உள்ளே இழுத்து வெளியே விடலாம்.

பயிற்சி 2

பள்ளிக்கூடங்களில் முட்டி போடுவது போல நின்று இடது காலை அகற்றாமல் வலது காலை தூரமாக நீட்டி கைகளை அதன் அருகே வைக்கவும். பத்து விநாடிகளுக்கு இதே நிலையில் இருந்துவிட்டு இடது காலுக்கு மாறவும். ஆழ்ந்த மூச்சை உள்ளே இழுத்து வெளியே விடலாம்.

மேலும் படிங்கஉடலில் உள்ள ஏழு சக்கரங்களுக்கும் சக்தியூட்டும் சக்கராசனம்

ஹனுமனாசனம் பயிற்சி

• இரண்டு கால்களிலும் முட்டி போட்டு நின்ற பிறகு வலது காலை மட்டும் முன்னே வைக்கவும்.
• இரு கைகளை வலது காலின் அருகே வைத்து மார்பு பகுதியை அழுத்தி கொஞ்சம் முன்னே சென்று அப்படியே பின்னே வந்த பிறகு வலது குதிகாலை முன்னும் இடது குதிகாலை பின்னும் நகர்த்தவும்.
• சிரமமாக இருந்தால் கற்களை அருகில் வைத்து கைகளை அதில் தாங்கி பிடிக்கவும். உங்கள் தொடை பகுதி, முட்டு கீழே இருக்க வேண்டும்.
• இப்போது கைகளை மேலே உயர்த்தி நமஸ்கார முத்ரா வைக்கவும் அல்லது மார்பு பகுதியிலும் நமஸ்கார முத்ரா வைக்கலாம்.
• வஜ்ராசன நிலைக்கு திரும்பி ஆழ்ந்த மூச்சை உள்ளே இழுத்து வெளியே விடலாம்.
• இதே போல இடது காலை மட்டும் முன்னே வைக்கவும். இரு கைகளை இடது காலின் அருகே வைத்து மார்பு பகுதியை அழுத்தி கொஞ்சம் முன்னே சென்று அப்படியே பின்னே வந்த பிறகு இடது குதிகாலை முன்னும் வலது குதிகாலை பின்னும் நகர்த்தவும்.
• இப்போது கைகளை மேலே உயர்த்தி நமஸ்கார முத்ரா வைக்கலாம். இந்த ஆசனம் கால்களில் நெகிழ்வுத்தன்மையை ஏற்படுத்தும். மேலும் இது வலியை தாக்குப்பிடித்து செய்ய வேண்டிய ஆசனமாகும்.

ஹனுமனாசனம் பயன்கள்

• ஹனுமனாசனம் இரத்த அழுத்தத்தை குறைக்க உதவுகிறது.
• BMI வரம்பை கட்டுக்குள் வைத்து இதய நோய்களின் அபாயத்தைக் குறைக்கிறது.
• ஹனுமானசனம் தசை வலிமை, நெகிழ்வுத்தன்மை மற்றும் சுறுசுறுப்புக்கு உதவுகிறது.