தமிழகத்தில் நடைபெறும் பெரும்பாலான அசைவ விருந்துகளில் நாம் ருசிக்க கூடிய உணவு கோலா உருண்டை. வெளியே மொறுமொறுப்பாகவும் உள்ளே மிருதுவாகவும் ருசிப்பதற்கு அட்டகாசமாக இருக்கும். வார விடுமுறையில் எப்போதும் பிரியாணி ருசிக்க வேண்டிய அவசியமில்லை. அரை கிலோ மட்டன் கொத்துக் கறி (கீமா) இருந்தால் ஒரு மணி நேரத்திற்குள் கோலா உருண்டைகளை தயாரித்து ஒரு பிடி பிடிக்கலாம். ரசம் சாதத்திற்கு கோலா உருண்டைகளை சைட் டிஷ் ஆக வைத்து சாப்பிட்டால் எத்தனை சாப்பிடுகிறோம் என்றே தெரியாது. சில சில தவறுகளால் எதிர்பார்த்த பதத்தில் கோலா உருண்டை செய்ய தவறி இருந்தால் இந்த ரெசிபியை பின்பற்றி செய்யுங்கள்.
மட்டன் கோலா உருண்டை செய்ய தேவையானவை
- மட்டன் கொத்துக்கறி
- முட்டை
- பொட்டுக்கடலை பவுடர்
- வெங்காயம்
- குண்டு மிளகாய்
- முழு தனியா
- முழு கரம் மசாலா
- சோம்பு
- மிளகு
- இஞ்சி-பூண்டு பேஸ்ட்
- மஞ்சள் தூள்
- மிளகாய் தூள்
- தனியா தூள்
- உப்பு
- கடலெண்ணெய்
- கறிவேப்பிலை
- கொத்தமல்லி
- நல்லெண்ணெய்
மட்டன் கோலா உருண்டை செய்முறை
- கடாயில் இரண்டு ஸ்பூன் நல்லெண்ணெய் ஊற்றி அது சூடானதும் ஒரு ஸ்பூன் சோம்பு, ஒரு ஸ்பூன் மிளகு, எட்டு குண்டு மிளகாய், முழு கரம் மசாலா, ஒரு ஸ்பூன் முழு தனியா, தேவையான அளவு கறிவேப்பிலை போட்டு வதக்கவும்.
- இரண்டு நிமிடங்கள் வதக்கியவுடன் ஒரு பெரிய வெங்காயத்தை பொடிதாக நறுக்கி போட்டு வதக்கவும். கோலா உருண்டைக்கு வெங்காயத்தை முற்றிலும் வதக்கி விடக் கூடாது. 50 விழுக்காடு வதக்கினால் போதும்.
- இதன் பிறகு இஞ்சி பூண்டு பேஸ்ட் ஒரு ஸ்பூன் சேர்த்து பச்சை வாடை போன பிறகு மசாலா பொருட்கள் போடுங்கள்.
- கால் டீஸ்பூன் மஞ்சள் தூள், தலா ஒரு ஸ்பூன் தனியா தூள், மிளகாய் தூள் மற்றும் உப்பு சேர்த்து கலந்துவிடவும்.
- அடுத்ததாக அரை கிலோ மட்டன் கொத்துக் கறியை போடுங்கள். கொழுப்பு குறைவாக கொத்துக் கறி வாங்கி சுத்தப்படுத்தி சேர்க்கவும்.
- சுமார் இருபது நிமிடங்களுக்கு மட்டன் வேகட்டும். தண்ணீர் ஊற்றி வேகவிட்டால் கோலா உருண்டை செய்ய முடியாது.
- இறுதியாக கொத்தமல்லி போட்டு அடுப்பில் இருந்து இறக்கி விடுங்கள். சூடு குறைந்தவுடன் கால் கிலோவாக மிக்ஸியில் போட்டு அரைத்து எடுக்கவும்.
- இதில் 5 ஸ்பூன் பொட்டுக்கடலை பவுடர் போடுங்கள். மொறுமொறுப்புக்கு இது உதவும்.
- இதோடு ஒரு முட்டையை உடைத்து ஊற்றி பிசைந்தால் கோலா உருண்டைக்கான மாவு கெட்டியான பக்குவத்தில் இருக்கும்.
- இரண்டு கோலி குண்டு சைஸில் கோலா உருண்டை உருட்டி வைக்கவும்.
- கடாயில் கடலெண்ணெய் ஊற்றி நன்கு சூடானதும் கோலா உருண்டைகளை ஒவ்வொன்றாக போட்டு 4-5 நிமிடங்களில் வறுத்து எடுக்கவும்.
இதுபோன்ற கட்டுரைகளுக்கு ஹெர் ஜிந்தகியுடன் தொடர்ந்து இணைந்திருங்கள்.
Take charge of your wellness journey—download the HerZindagi app for daily updates on fitness, beauty, and a healthy lifestyle!
Comments
எல்லா கருத்துகளும் (0)
Join the conversation