முள்ளங்கி சாப்பிட்டால் வாயு தொல்லை ஏற்படுவது ஏன் ? வேறு எப்படி சமைத்து சாப்பிடலாம் ?

வாயு தொல்லை ஏற்படுவதற்கு பெரும்பாலும் நாம் சாப்பிடும் உணவுகளே காரணமாகும். முள்ளங்கி சாப்பிட்டால் வாயு தொல்லையால் அவதிப்படுவோம் என அறிந்ததே. இதை சிரித்து கடந்துவிடாமல் முள்ளங்கி சாப்பிட்டால் வாயு தொல்லை ஏற்படுவது ஏன் ? முள்ளங்கியை எவ்வாறு சமைத்தால் வாயு தொல்லையை தவிர்க்கலாம் போன்ற விஷயங்களை இந்த பதிவில் தெரிந்து கொள்ளுங்கள். நார்ச்சத்து நிறைந்த முள்ளங்கி அரை மணி நேரத்தில் ஜீரணம் ஆக வாய்ப்புண்டு. எனினும் அதில் உள்ள ராஃபினோஸ் சர்க்கரையை உடைத்து செரிமானம் ஆவதற்கு நேரமெடுக்கும்.

முள்ளங்கி சாப்பிட்டால் வாயு தொல்லை ?

முள்ளங்கியின் அதிக நார்ச்சத்து

பிற காய்கறிகளை போல முள்ளங்கியிலும் அதிகளவு நார்ச்சத்து உள்ளது. நார்ச்சத்து செரிமானத்திற்கு உதவும் என்பதை அறிவோம். ஆனால் அதை அதிகமாக உட்கொண்டால் வாயு மற்றும் வயிறு உப்புசம் உண்டாகும். ஒரு சிலருக்கு செரிமான அமைப்பில் மிகப்பெரிய தாக்கம் ஏற்படலாம்.

முள்ளங்கியில் சர்க்கரை

முள்ளங்கியில் ராஃபினோஸ் போன்ற சர்க்கரை இருக்கிறது. ராஃபினோஸ் நம்முடைய குடல் அமைப்பில் ஜீரணம் ஆவது மிகக் கடினம். குடல் அமைப்பில் உள்ள பாக்டீரியாக்கள் ராஃபினோஸ் சர்க்கரையை புளிக்க வைத்து வாயுவை உருவாக்கிடும். ஒரு சிலர் அதிகளவில் முள்ளங்கி சாப்பிட்டாலும் எந்த பிரச்னையும் ஏற்படாது. இது நபருக்கு நபர் மாறுபடும். வேறு சிலர் கொஞ்சமாக சாப்பிட்டாலும் அசெளகரியமாக உணர்வார்கள்.

முள்ளங்கியுடன் இதர உணவுகள்

முள்ளங்கியை போல் மொச்சைக்காய் சாப்பிடுவதும் வாயு தொல்லையை உண்டாக்கும். இவை இரண்டையும் ஒரே நேரத்தில் சாப்பிட்டால் கண்டிப்பாக வயிற்றில் வாயு உருவாவதை தடுக்க இயலாது.

முள்ளங்கியை சமைப்பது எப்படி ?

• முள்ளங்கி சாப்பிட்டு வாயு தொல்லை ஏற்படாமல் இருக்க அதை சமைப்பதற்கு முன் அரை மணி நேரம் குளிர்ந்த நீரில் ஊறவைக்கவும். இது முள்ளங்கியில் உள்ள ராஃபினோஸை உடைக்கும். அதன் பிறகு வறுத்து அல்லது வேக வைத்து சாப்பிட்டால் எளிதில் செரிமானம் ஆகும்.
• தயிர் அல்லது கேஃபிரை முள்ளங்கியுடன் சேர்த்து சமைத்தால் குடல் நுண்ணுயிரிகள் பாதுகாக்கப்படும். இதோடு கொஞ்சம் இஞ்சி மற்றும் பெருஞ்சீரகம் போடவும்.
• முள்ளங்கி சாப்பிட்டு வாயு தொல்லை ஏற்படுவதை தவிர்க்க நினைத்தால் அதை நன்கு வேக வைத்து செரிமானத்திற்கு உதவும் ஓமம், புதினாவுடன் கலந்து சாப்பிடவும்.

மேலும் படிங்க  வாயு அடைப்பால் பலூன் போல் மாறிய வயிற்றை சரி செய்வதற்கு பாட்டி வைத்தியம் பின்பற்றுங்க

இதுபோன்ற கட்டுரைகளுக்கு ஹெர் ஜிந்தகியுடன் தொடர்ந்து இணைந்திருங்கள்.