மாதவிடாய் சுழற்சி பெண்களின் முடி வளர்ச்சியைப் பாதிக்குமா? முழு விபரம் இங்கே!

மாதவிடாய் காலத்திற்கு முன்னதாகவும், சுழற்சி முடிந்த பின்னதாகவும் பெண்களின் உடலில் பல்வேறு விதமான ஹார்மோன் மாற்றங்களை சந்திக்க நேரிடும். தலைவலி, வயிற்று வலி, மூட்டு வலி, உடல் அசௌகரியம் போன்ற பல்வேறு பிரச்சனைகளை நிச்சயம் ஒவ்வொரு பெண்களும் அனுபவித்து இருப்போம். ஆனால் மாதவிடாய் ஏற்படும் போது, உங்கள் உடலை மட்டுமல்ல, தலைமுடியிலும் பாதிப்பை ஏற்படுத்தும் என்பது தெரியுமா? ஆம் மாதவிடாய் காலத்தில் ஏற்படும் ஹார்மோன் மாற்றங்களினால் தலைமுடி கொட்டுவதல் முதல் பல்வேறு பிரச்சனைகளைப் பெண்கள் சந்திக்க நேரிடும்.

மேலும் படிக்க:சிறுநீர் தொற்று ஏற்பட என்ன காரணம் ? அதன் அறிகுறிகள் என்ன?

மாதவிடாய் சுழற்சியும் முடி உதிர்தல் பிரச்சனை:

பொதுவாக பெண்களுக்குக் கர்ப்ப காலங்களிலும், மாதவிடாய் நிற்கும் காலத்திலும் முடி உதிர்தல் பிரச்சனை ஏற்படுவது இயல்பான ஒன்று. இதோடு மாதவிடாய் தொடங்கும் போது பெண்களுக்கு ஈஸ்ட்ரோஜனின் அளவு குறைவாக இருக்கும் என்பதால் பெண்களுக்கு இயல்பை விட முடி அதிகமாக கொட்டக்கூடும். இப்பிரச்சனையைத் தவிர்க்க வேண்டும் என்றால் தலைமுடியை மிகவும் இறுக்கமாக பின்னக்கூடாது மற்றும் முறையான பராமரிப்பு அவசியம் என மருத்துவர்கள் கூறுகின்றனர்.

என்னென்னப் பிரச்சனைகள் ஏற்படும்?

• மாதவிடாய் சமயத்தில் ஏற்படும் ஹார்மோன் மாற்றங்களால் பெண்களின் கூந்தல் எண்ணெய் பசையாக இருக்கும். மாதவிடாய் வருவதற்கு சில நாள்கள் அல்லது வாரத்திற்கு முன்னதாக பெண்களுக்கு ஈஸ்ட்ரோஜன் மற்றும் புரோஜெஸ்ட்டிரோன் ஆகியவற்றின அளவில் மாறுதல்கள் ஏற்படும். இதனால் சீபம் உருவாகும் தன்மை அதிகரித்து, சருமம் மற்றும் தலைமுடியின் வேர் வரை எண்ணெய் பசையை ஏற்படுத்தும்.
• தலைமுடியில் ஏற்படக்கூடிய அதீத எண்ணெய் பசைத்தன்மையும் முடி உதிர்தல் பிரச்சனைக்கு முக்கிய காரணமாக அமைகிறது.
• மாதவிடாய் காலத்தில் பெண்களுக்கு ஏற்படக்கூடிய ஹார்மோன் மாற்றங்கள் செபாசியஸ் சுரப்பிகள் அதிகமாகும். இது உடலின் வெப்பநிலையை அதிகரித்து முடியின் வளர்ச்சியைப் பாதிக்கிறது.

தடுப்பது எப்படி?

• சாதாரண நாட்களை விட மாதவிடாய் காலத்தில் பெண்களுக்கு முடி உதிர்தல் பிரச்சனை அதிகமாக இருக்கும் என்பதால் தலைமுடி பராமரிப்பு அவசியமான ஒன்று.
• தலைமுடியைப் பராமரிக்க PH சமச்சீர் அளவுள்ள ஷாம்பூவைப் பயன்படுத்த வேண்டும். இதோடு இலகுரக மற்றும் எண்ணெய் இல்லாத தயாரிப்புகளுடன் கூடிய முடி பராமரிப்பு வழக்கத்தைப் பின்பற்றவும்.
• முடியைப் பாதுகாப்புடன் பராமரிக்க ஊட்டச்சத்துள்ள உணவுகளைக் கட்டாயம் உணவில் சேர்த்துக் கொள்ள வேண்டும். மேலும் உடலை எப்போதும் நீரேற்றத்துடன் வைத்திருக்க வேண்டும் என்றால் மற்ற நாள்களை விட மாதவிடாய் காலத்தில் அதிகளவு தண்ணீர் குடிக்க வேண்டும். இது உடல் சோர்வை குறைக்கக்கூடும்.