பழங்கள் மட்டுமே சாப்பிட்டு எடை குறைக்கலாமா? இந்த பிரச்சனைகள் வரும் ஜாக்கிரதை

பழங்கள் என்பது இயற்கையான ஊட்டச்சத்துக்களின் களஞ்சியம். இது அதிக வைட்டமின்கள், தாதுக்கள் மற்றும் நார்ச்சத்துக்களைக் கொண்டுள்ளன. இருந்தாலும் பழங்கள் மட்டும் சாப்பிடும் டயட் (Fruitarian Diet) நீண்ட காலத்திற்கு பின்பற்றினால் பல்வேறு ஆரோக்கிய பிரச்சனைகள் மற்றும் உடலில் பக்க விளைவுகளை ஏற்படுத்தலாம். இந்தக் கட்டுரையில் பழங்கள் மட்டும் சாப்பிடும் உணவுமுறையின் தீமைகளைப் பற்றி விரிவாகப் பார்க்கலாம்.

புரதம் மற்றும் கொழுப்பு குறைபாடு:

பழங்களில் புரதம் மற்றும் ஆரோக்கியமான கொழுப்புகள் மிகக் குறைவாக உள்ளன. நீண்ட காலம் பழங்களை மட்டும் உண்பதால் தசை இழப்பு, சோர்வு, நோயெதிர்ப்பு சக்தி குறைதல் போன்ற பிரச்சினைகள் ஏற்படலாம். உடலின் சரியான செயல்பாட்டிற்கு புரதம் மற்றும் கொழுப்புகள் அவசியம், எனவே இந்த உணவுமுறை சமச்சீரற்ற ஊட்டச்சத்து குறைபாட்டை ஏற்படுத்தும்.

இரத்த சர்க்கரை அளவு அதிகரிப்பு:

பழங்களில் இயற்கையான சர்க்கரை அதிக அளவில் உள்ளது. அதிக பழங்களை உட்கொள்வது இரத்த சர்க்கரை அளவை திடீரென உயர்த்தி, குறிப்பாக நீரிழிவு நோயாளிகளுக்கு ஆபத்தை ஏற்படுத்தும். தொடர்ந்து உயர் சர்க்கரை அளவு உடல் எடை அதிகரிப்பு, இன்சுலின் தடுப்பாற்றல் போன்ற பிரச்சினைகளுக்கு வழிவகுக்கும்.

செரிமான பிரச்சனைகள்:

பழங்களில் அதிக நார்ச்சத்து இருப்பது நல்லது என்றாலும், அதிகப்படியான நார்ச்சத்து வயிற்றுப்போக்கு, வாயு, வயிற்று வலி போன்ற செரிமான பிரச்சினைகளை உருவாக்கும். குறிப்பாக, அதிக பழச்சாறுகள் மற்றும் அதிக சர்க்கரை கொண்ட பழங்கள் இரைப்பை அமிலத்தன்மையை அசிடிட்டி அதிகரிக்கும்.

எலும்புகளின் வலிமை குறைதல்:

பழங்களில் கால்சியம் மற்றும் வைட்டமின் D போன்ற தாதுக்கள் குறைவாக உள்ளன. நீண்ட காலம் பழங்கள் மட்டும் உண்பதால் எலும்புகள் பலவீனமடையும், மேலும் ஆஸ்டியோபோரோசிஸ் (எலும்புருக்கி நோய்) போன்ற பிரச்சினைகள் ஏற்பட வாய்ப்புள்ளது. குறிப்பாக பெண்களுக்கு இது பெரிய ஆபத்தாக இருக்கும்.

பல் சொத்தை மற்றும் அமிலத்தன்மை:

பழங்களில் உள்ள இயற்கை அமிலங்கள் (சிட்ரிக் அமிலம், மாலிக் அமிலம்) பல் சொத்தை மற்றும் பல் எனாமல் பிரச்சனை ஏற்படுத்தும். அடிக்கடி பழங்கள் மற்றும் பழச்சாறுகளை உட்கொள்வது பற்களின் ஆரோக்கியத்தை பாதிக்கும்.

மேலும் படிக்க: இரவில் என்ன சாப்பிடுவது என்று குழப்பமா? எடை குறைக்க உதவும் சூப்பர் உணவுகள் இதோ

உடல் ஆற்றல் குறைதல் மற்றும் சோர்வு:

பழங்கள் விரைவாக செரிமானமாகி உடலுக்கு சக்தியைத் தரும், ஆனால் நீண்ட நேரம் வயிறு நிரம்பியதாக இருக்காது. இதனால் உங்களுக்கு தொடர்ச்சியான பசி, சோர்வு, தலைச்சுற்றல் மற்றும் ஆற்றல் குறைபாடு ஏற்படலாம். உடல் எடை குறைக்க இந்த உணவுமுறையை பின்பற்றுபவர்கள், பிற்காலத்தில் மீண்டும் எடை அதிகரிக்கும் யோ-யோ விளைவை அனுபவிக்கலாம்.

அந்த வரிசையில் பழங்கள் ஊட்டச்சத்து நிறைந்தவை, ஆனால் பழங்கள் மட்டும் உண்ணும் உணவுமுறை உங்கள் உடலுக்கு ஒரு சமச்சீரான ஊட்டச்சத்து வழங்காது. இது குறுகிய காலத்தில் எடை குறைக்க உதவினாலும், நீண்ட காலத்திற்கு பின்பற்றினால் பல்வேறு ஆரோக்கிய பிரச்சினைகளை உருவாக்கும். பழங்களுடன் பிற ஊட்டச்சத்துக்கள் (புரதம், கொழுப்பு, தாதுக்கள்) நிறைந்த உணவுகளையும் சேர்த்து ஒரு சீரான உணவு முறையை பின்பற்றுவது நம் உடலுக்கு நல்லது. எந்தவொரு புதிய உணவு டயட் முறையையும் தொடங்குவதற்கு முன், ஒரு ஊட்டச்சத்து நிபுணர் அல்லது மருத்துவரின் ஆலோசனையைப் பெறுவது அவசியம்.

Image source: google