Alanganallur Jallikattu: துள்ளிவரும் காளைகளை மல்லுக்கட்டி அடக்கும் உலகப்புகழ் பெற்ற அலங்காநல்லூர் ஜல்லிக்கட்டு குறித்த சுவாரஸ்சிய தகவல்கள்

தமிழகம் முழுவதும் மூன்று தினங்கள் ஒவ்வொரு விதமாக கொண்டாட்டங்கள் இருந்தாலும், மதுரை என்றாலே சட்டென்று அனைவரது நினைவிற்கு நியாபகம் வருவது ஜல்லிக்கட்டு போட்டிகளாக இருக்கும். தை 1 ல் மதுரை அவனியாபுரம், தை 2 ஆம் தேதி மதுரை பாலமேடு, தை 3 ல் மதுரை அலங்காநல்லூர் என மூன்று இடங்களில் நடைபெறும் ஜல்லிக்கட்டு போட்டிகள் மிகவும் புகழ்பெற்றது. குறிப்பாக மற்ற இரண்டு ஊர்களைக் காட்டிலும் அலங்காநல்லூர் மட்டும் ஏன் இவ்வளவு புகழ்பெற்றது? வெளிநாட்டினரே வியந்துப் பார்க்கும் அளவிற்கு அதன் சிறப்புகள் என்னென்ன தெரியுமா?

வாடிவாசல் சிறப்பு?

தமிழகத்தில் பிற இடங்களில் இல்லாத வகையில் அலங்காநல்லூரில் அமைந்துள்ள வாடிவாசல் மிகவும் சிறப்பு வாய்ந்தது. ஊர் மந்தையில் காளியம்மன் மற்றும் முத்தாலம்மன் கோவில் என இரண்டு கோவில்களுக்கு இடையே வாடிவாசல் அமைந்துள்ளது. அவனியாபுரம், பாலமேடு என மற்ற இடங்களைப் போன்றில்லாமல் அலங்காநல்லூரில் அமைக்கப்பட்டுள்ள வாடிவாசல் நேராக இருக்காது. மிகவும் குறுகலாக இருப்பதோடு நேராக வந்து கொஞ்சம் திருப்பிச் செல்லும். அதாவது வாடிவாசலில் இருந்து “ட“ வடிவில் வாடிவாசல் அமைந்திருக்கும்.

போட்டிகள் தொடங்கியதும் வாடிவாசலில் இருந்து சீறி வரும் காளைகள் உடனே வெளியே செல்ல முடியாது. ஒவ்வொரு மூலைகளாக ஆங்காங்கே ஆங்காங்கே சுற்றித் திரியும். துள்ளி வரும் காளைகளை அடக்க காளையர்களும் போட்டி போட்டுக் கொண்டு திமிலைப் பிடிக்க முயல்வார்கள். ஜல்லிக்கட்டு காளைகளும், வீரர்களும் மாறி மாறி தங்களது வெற்றிக்குப் போராடும் அழகு ஒருபுறம் இருந்தாலும், கொம்பு முட்டி பல வீரர்கள் காயம் அடைவார்கள். இதெல்லாம் எங்களது வீரத்திற்கு ஒரு அடையாளம் என கொஞ்சம் கூட பொருட்படுத்தாமல் மீண்டும் களத்தில் உற்சாகம் குறையாமல் துள்ளி விளையாடுவார்கள்.

கூட்டத்தைப் பார்த்து பயந்து செல்லாமல், குறுகலான வாடிவாசலில் நின்று விளையாடும் காளைகள் மற்றும் வீரர்களைப் பார்ப்பதற்காகவே உள்ளூர்வாசிகள் மட்டுமல்ல வெளிநாட்டினர் பலரும் கலந்துக் கொள்வார்கள். “ அடக்க முடியாத எந்த காளைகளும் அலங்காநல்லூரில் அடங்கிவிடும்” என்பதால் இந்த ஜல்லிக்கட்டு போட்டிகள் மிகவும் பிரசிதிப்பெற்றதாக உள்ளது என ஜல்லிக்கட்டு ஆர்வலர்கள் கூறுகின்றனர்.