Amla Oil for Hair: குளிர்காலத்தில் நெல்லிக்காய் எண்ணெய் பயன்படுத்துவதால் கூந்தலுக்கு கிடைக்கும் நன்மைகள் என்னென்ன?

Hair Care Tips: குளிர்காலம் மற்றும் மழைக்காலம் என்பது மனதிற்கு இதமான ஒரு காலகட்டமாக இருந்தாலும், நமது கூந்தலை பொறுத்தவரை இது சற்று சவாலான நேரமாகும். அதிகப்படியான ஈரப்பதம் மற்றும் குளிர்ந்த காற்று ஆகியவை நமது தலைமுடியின் ஆரோக்கியத்தை பெரிதும் பாதிக்கின்றன. குறிப்பாக, இந்த காலக்கட்டத்தில் முடி உதிர்வு, வறட்சி மற்றும் பொடுகு தொல்லை போன்ற பிரச்சனைகள் அதிகரிக்கின்றன.

குளிர்காலத்தில் நெல்லிக்காய் எண்ணெய் பயன்படுத்துவதால் கூந்தலுக்கு கிடைக்கும் நன்மைகள்:

இதனை சமாளிக்க சிறந்த வழி, சரியான பராமரிப்பு முறைகளை பின்பற்றுவது ஆகும். இரசாயனங்கள் கலந்த பொருட்களை பயன்படுத்துவதை விட, இயற்கையான நெல்லிக்காய் எண்ணெயை பயன்படுத்துவது கூந்தலுக்கு புத்துயிர் அளிக்கும். நெல்லிக்காய் எண்ணெய் எப்படி குளிர்கால கூந்தல் பிரச்சனைகளை தீர்க்கிறது? அதை எவ்வாறு பயன்படுத்த வேண்டும்? என்பது குறித்து இதில் விரிவாக காண்போம்.

குளிர்காலத்தில் ஏன் நெல்லிக்காய் எண்ணெய் பயன்படுத்த வேண்டும்?

நெல்லிக்காய் எண்ணெய் ஒரு இயற்கையான கண்டிஷனர் போல செயல்படுகிறது. இது கூந்தலை மென்மையாகவும், பளபளப்பாகவும் மாற்றுகிறது.

• ஈரப்பதத்தை தக்கவைக்கும்: குளிர்காலத்தில் கூந்தல் வறண்டு போவதை தடுக்க, நெல்லிக்காய் எண்ணெய் முடியின் வேர்க்கால்களில் ஒரு பாதுகாப்பு அடுக்கை உருவாக்குகிறது. இது முடியில் உள்ள ஈரப்பதத்தை வெளியேறாமல் பார்த்துக் கொள்கிறது.
• இரத்த ஓட்டம்: இந்த எண்ணெய் முடியின் வேர்கள் வரை ஊடுருவிச் சென்று, உச்சந்தலையில் இரத்த ஓட்டத்தை அதிகரிக்க உதவுகிறது. இதனால் முடிக்கு தேவையான ஊட்டச்சத்துகள் எளிதாக கிடைக்கின்றன.
• சேதத்தை தடுக்கும்: இது சுற்றுச்சூழலால் ஏற்படும் மாசுகளிலிருந்து முடியை பாதுகாப்பதோடு, கூந்தல் வேர்க்கால்களுக்குள் இருக்கும் சமநிலையை மீட்டெடுக்கிறது.

மேலும் படிக்க: Winter Hair Care Tips: குளிர்காலத்தில் அதிகரிக்கும் முடி உதிர்வை கட்டுப்படுத்த இந்த குறிப்புகளை அவசியம் பின்பற்றவும் 

நெல்லிக்காய் எண்ணெயின் முக்கிய நன்மைகள்:

நெல்லிக்காய் எண்ணெயை தொடர்ந்து பயன்படுத்துவதால் கூந்தலுக்கு கிடைக்கும் நன்மைகள் ஏராளம். அவற்றில் முக்கியமான சில பயன்களை ஒவ்வொன்றாக பார்க்கலாம்.

இளநரையை தடுக்கும்:

இன்றைய காலத்தில் பலருக்கும் இருக்கும் பெரிய பிரச்சனை இளநரை. நெல்லிக்காய் எண்ணெய், முடியின் வேர்க்கால்களில் ஏற்படும் ஆக்ஸிஜனேற்ற அழுத்தத்தை (Oxidative stress) குறைக்கிறது. இது நரை முடி விரைவில் வராமல் தடுத்து, முடியின் கருமை நிறத்தை தக்கவைக்க உதவுகிறது.

இயற்கையான கண்டிஷனர்:

நெல்லிக்காயில் உள்ள கொழுப்பு அமிலங்கள் (Fatty acids) முடியை மென்மையாக்குகின்றன. குளிர்காலத்தில் ஷாம்பூ பயன்படுத்திய பிறகு முடி வறண்டு போகாமல் இருக்க, குளிப்பதற்கு முன் இந்த எண்ணெயை பயன்படுத்தலாம்.

கூந்தல் அடர்த்தியை அதிகரிக்கும்:

மெலிந்த முடியை அடர்த்தியாக மாற்ற நெல்லிக்காய் எண்ணெய் சிறந்தது. இது முடி உதிர்வை குறைத்து, புதிய முடி வளர்ச்சியை தூண்டுகிறது. இதை தொடர்ந்து பயன்படுத்தி வந்தால், முடியின் அடர்த்தி அதிகரிப்பதை நன்கு உணரலாம்.

பொடுகு தொல்லைக்கு தீர்வு:

குளிர்காலத்தில் உச்சந்தலை வறண்டு போவதால் அல்லது அதிகப்படியான எண்ணெய் சுரப்பால் பொடுகு தொல்லை ஏற்படும். நெல்லிக்காய் எண்ணெய், உச்சந்தலையை சுத்தம் செய்து, அதிகப்படியான எண்ணெய்யை உறிந்து கொள்கிறது. இது பொடுகை கட்டுப்படுத்த மிகச் சிறந்த வழியாகும்.

முடியை வலுப்படுத்தும்:

இது இழந்த புரதச்சத்தை முடிக்கு மீண்டும் வழங்குகிறது. இதனால் முடி உதிர்வது குறைந்து, வேரிலிருந்து நுனி வரை கூந்தல் வலுவாக இருக்கும்.

மேலும் படிக்க: Winter Skin Care: குளிர்காலத்தில் உங்கள் முகத்தை வறண்டு போகாமல் பாதுகாக்க உதவும் டாப் 5 ஹோம்மேட் ஃபேஸ்பேக் 

நெல்லிக்காய் எண்ணெயை பயன்படுத்தும் முறை:

நெல்லிக்காய் எண்ணெயை சரியான முறையில் பயன்படுத்தினால் மட்டுமே முழுமையான பலன் கிடைக்கும். அதற்கான எளிய வழிமுறைகளை காணலாம்.

• சிறிதளவு நெல்லிக்காய் எண்ணெயை உள்ளங்கையில் ஊற்றி, இரண்டு கைகளாலும் தேய்த்து லேசாக சூடுபடுத்தவும்.
• இதை உச்சந்தலை மற்றும் முடியின் வேர் முதல் நுனி வரை நன்றாக தடவவும்.
• விரல்களால் 5 முதல் 10 நிமிடங்கள் வரை மெதுவாக மசாஜ் செய்யவும்.
• பிறகு ஒரு ஷவர் கேப் அல்லது துணியால் தலையை மூடி வைக்கவும்.
• 15 நிமிடங்கள் முதல் ஒரு மணி நேரம் வரை அப்படியே இதனை ஊறவிடவும்.
• இறுதியாக, மிதமான ஷாம்பூ கொண்டு தலைக்கு குளித்து விடலாம்.

இந்த செயல்முறையை வாரத்திற்கு இரண்டு முறை தொடர்ச்சியாக பயன்படுத்தி வந்தால், குளிர்காலத்தில் ஏற்படும் கூந்தல் தொடர்பான பிரச்சனைகளை கட்டுப்படுத்த முடியும்.

இந்தக் கட்டுரை உங்களுக்குப் பிடித்திருந்தால், அதைப் பகிரவும் மேலும் இதே போன்ற பிற கட்டுரைகளைப் படிக்க Her Zindagi உடன் இணைந்திருங்கள்.

Image Credit: Freepik