Winter Skin Care Tips: குளிர்காலத்தில் உங்கள் சருமத்தின் பொலிவை தக்கவைக்க உதவும் 5 ஹோம்மேட் ஃபேஸ்பேக் இதோ

Winter Skin Care Tips: குளிர்காலம் வந்துவிட்டால் சருமம் வறண்டுபோதல், பொலிவிழத்தல் போன்ற பிரச்சனைகளும் சேர்ந்து வந்துவிடும். குளிர்ச்சியான காற்று சருமத்தின் ஈரப்பதத்தை உறிந்து விடுவதால், சருமத்தின் பளபளப்பு சில சமயங்களில் குறைந்து விடுகிறது. 

இந்த சூழ்நிலையில், நம் சமையலறையில் உள்ள இயற்கை பொருட்கள் நம்முடைய சருமத்திற்கு தேவையான ஊட்டச்சத்தையும், ஈரப்பதத்தையும் அளித்து, அதன் பளபளப்பை மீட்டெடுக்க உதவுகின்றன. அதன்படி, எளிதாக தயாரித்து பயன்படுத்தக் கூடிய 5 ஹோம்மேட் ஃபேஸ்பேக் குறித்து தற்போது பார்க்கலாம். இதன் மூலம் இரசாயனங்கள் இன்றி இயற்கையான முறையில் நமது சருமத்தை பொலிவாக மாற்ற முடியும்.

மஞ்சள் ஃபேஸ் பேக்:

நம்முடைய பாரம்பரிய அழகு சாதன பொருட்களில் மஞ்சள் எப்போதுமே முதன்மையானது. சருமம் தொடர்பான பிரச்சனைகளுக்கு தீர்வு காண, இதனை நாம் பல ஆண்டுகளாக பயன்படுத்தி வருகிறோம். மஞ்சளில் உள்ள அதிக அளவிலான அன்டிஆக்ஸிடன்ட்கள், சரும ஆரோக்கியத்தை மேம்படுத்துவதில் முக்கிய பங்கு வகிக்கின்றன. இது வீக்கத்தை குறைக்கும் தன்மைகளை கொண்டது. மேலும், இது சருமத்தின் நிறத்தை மேம்படுத்தவும், பொலிவை அதிகரிக்கவும் உதவுகிறது.

இதற்காக, ஒரு தேக்கரண்டி மஞ்சள் தூள் மற்றும் ஒரு தேக்கரண்டி தேன் இரண்டையும் சேர்த்து ஒரு பசை போல நன்றாக கலக்கவும். இந்தக் கலவையை முகம் மற்றும் கழுத்து பகுதியில் மென்மையாக பூசவும். இதற்கடுத்து, சுமார் 20 முதல் 25 நிமிடங்கள் காய்ந்த பிறகு, குளிர்ந்த நீரால் முகத்தை கழுவி விடலாம். இது முகப்பருக்களை குறைக்க பெரிதும் பயன்படுகிறது. தேனில் உள்ள ஈரப்பதம், குளிர்காலத்தில் ஏற்படும் வறட்சியையும் நீக்கும்.

மேலும் படிக்க: Skin care tips: உங்கள் சருமத்தின் பொலிவை இயற்கையாக அதிகரிக்க வேண்டுமா? இந்த 6 உணவுகளை அவசியம் சாப்பிடவும்

சந்தனம் ஃபேஸ்பேக்:

சருமத்தின் அமைப்பை மேம்படுத்த பல நூற்றாண்டுகளாக பயன்படுத்தப்படும் பொருட்களில் சந்தனமும் ஒன்றாகும். இது நறுமணம் மட்டுமல்லாமல், சருமத்திற்கு ஊட்டமளிக்கும் பல பண்புகளையும் கொண்டுள்ளது. சருமத்திற்கு ஒரு குளிர்ச்சி உணர்வை சந்தனம் தருகிறது. மேலும், இது சருமத்தின் நிறத்தை பராமரிக்கவும், அழுக்குகளை நீக்கவும் உதவுகிறது. இது ஆழமாக சுத்தப்படுத்தும் தன்மையை கொண்டது.

சந்தனத்தை எடுத்து போதுமான அளவு பன்னீருடன் கலந்து ஒரு மென்மையான பசையை உருவாக்கவும். இந்தக் கலவையை உங்கள் முகத்தில் தடவி, 20 நிமிடங்களுக்கு பிறகு குளிர்ந்த நீரால் கழுவவும். இந்த ஃபேஸ் பேக், சருமத்தை ஆழமாக சுத்தம் செய்து அசுத்தங்களை நீக்குகிறது. இதனால் சருமத்தின் நிறம் சற்று பொலிவு பெற உதவுகிறது. சருமம் கருமையாவதை தடுக்கவும் இது பயன்படும்.

வெள்ளரிக்காய் சாறு:

இது உங்கள் சருமத்திற்கு சிறந்த கிளென்சராக (Cleanser) செயல்படுகிறது.
வெள்ளரியில் இயற்கையான முறையில் சருமத்தை சுருங்க வைக்கும் பண்புகள் (Astringent property) உள்ளன. இது சரும துளைகளை (Skin Pores) ஆழமாக சுத்தப்படுத்த உதவுகிறது. அத்துடன், சருமத்திற்கு உடனடி குளிர்ச்சியையும், புத்துணர்ச்சியையும் வெள்ளரி அளிக்கிறது. இதற்காக, ஒரு சிறிய பாத்திரத்தில் வெள்ளரி சாறை எடுத்துக் கொள்ளவும். சிறிது காட்டன் துண்டை பயன்படுத்தி, இதனை முகம் முழுவதும் தடவி எடுக்க வேண்டும். சில நிமிடங்களுக்கு பின்னர், ஈரமான துணியால் முகத்தை துடைத்து விடலாம். வெள்ளரி சாறு, சுற்றுச்சூழலின் கடுமையான விளைவுகளால் ஏற்பட்ட அழுக்குகளை துளைகளிலிருந்து நீக்கி, சருமத்திற்கு புத்துணர்ச்சி அளிக்கிறது.

மேலும் படிக்க: Skin care tips: சரும பராமரிப்புக்கு உதவும் பீட்ரூட்; இனிமே தினமும் இப்படி யூஸ் பண்ணுங்க

கற்றாழை ஃபேஸ் பேக்:

கற்றாழையில் ஊட்டமளிக்கும் பண்புகள் நிறைந்துள்ளன. இது உங்கள் சருமத்திற்கு புத்துயிர் அளித்து இயற்கையான பொலிவை தர உதவுகிறது. கற்றாழையில் உள்ள வைட்டமின் சி மற்றும் வைட்டமின் ஈ போன்ற சத்துகள், சருமத்தின் ஆழத்தில் இருந்து ஊட்டமளித்து, இயற்கையான பளபளப்பை மீட்டெடுக்க உதவுகின்றன. இது சருமத்தில் ஈரப்பதத்தை தக்கவைக்க உதவுகிறது.

ஒரு சிறிய பாத்திரத்தில் 1 தேக்கரண்டி கற்றாழை ஜெல், ஒரு சிட்டிகை மஞ்சள், 1 தேக்கரண்டி தேன் மற்றும் 1 தேக்கரண்டி பால் ஆகியவற்றை சேர்க்கவும். இந்த கலவையை நன்றாக கலந்து முகம் மற்றும் கழுத்து பகுதிகளில் சமமாக பூசவும். சுமார் 20 நிமிடங்களுக்கு பிறகு, வெதுவெதுப்பான நீரில் இதனை கழுவி விடலாம். கற்றாழையும், தேனும் இணைந்து குளிர்கால வறட்சியை போக்கி, சருமத்தின் இயற்கையான ஈரப்பதத்தை மீட்டெடுக்க உதவுகின்றன. இது சருமத்திற்கு உடனடி பளபளப்பை கொடுக்கும்.

பன்னீர்:

இது சருமத்திற்கான இயற்கை டோனர் போன்று செயல்படும். சருமத்தின் பி.ஹெச் (pH) சமநிலையை பராமரிக்கும் அதே வேளையில், சருமத்தை சுத்தப்படுத்தி புத்துணர்ச்சி அளிக்கும் ஆற்றலை பன்னீர் கொண்டுள்ளது. பன்னீரை சுமார் 30 நிமிடங்களுக்கு ஃப்ரிட்ஜில் வைக்க வேண்டும். இதனை சிறிய துண்டு காட்டனில் நனைத்து சருமத்தில் மிதமாக தடவலாம். இப்படி செய்யும் போது சருமத்திற்கு புத்துணர்ச்சி அளித்து, பொலிவுடன் காண உதவுகிறது. இது சருமத்தின் பளபளப்பை குறைக்காமல், அசுத்தங்களை அகற்ற உதவுகிறது.

இந்தக் கட்டுரை உங்களுக்குப் பிடித்திருந்தால், அதைப் பகிரவும் மேலும் இதே போன்ற பிற கட்டுரைகளைப் படிக்க Her Zindagi உடன் இணைந்திருங்கள்.

Image Credit: Freepik