உங்கள் சருமத்திற்கு இயற்கை பொலிவை கொடுக்கும் கிரீன் டீ ஃபேஸ் பேக்

உடல் எடையை குறைக்க உதவும் கிரீன் டீ உங்கள் சரும அழகை பாதுகாப்பதிலும் முக்கிய பங்கு வகிக்கிறது. முகப்பரு, அடைபட்ட துளைகள் மற்றும் பொலிவின்மை போன்ற பல சரும பிரச்சனைகளுக்கு கிரீன் டீ ஒரு சிறந்த இயற்கை தீர்வாகும்.

மேலும் படிக்க: இளநரை பிரச்சனையால் பாதிக்கப்பட்டவரா நீங்கள்? இந்த 5 உணவுகளை அவசியம் சாப்பிடவும்

கிரீன் டீ ஃபேஸ் பேக்கின் நன்மைகள்:

கிரீன் டீயில் உள்ள இயற்கையான பாக்டீரியா எதிர்ப்பு பண்புகள் முகப்பரு போன்ற சரும பிரச்சனைகளை சரிசெய்ய உதவுகிறது. மேலும், இதில் இருக்கும் பாலிஃபீனால்கள் சரும தொற்றுகளை எதிர்த்து போராடி முகப்பருவை குறைக்கின்றன. இது வீக்கம் மற்றும் சிவந்து போன சருமத்தை சீராக்கி, இயற்கையான பளபளப்பை அளிக்கிறது. அதன்படி, கிரீன் டீ கொண்டு ஃபேஸ் பேக் தயாரிக்கும் முறைகளை இப்போது பார்க்கலாம்.

மஞ்சள் மற்றும் கிரீன் டீ ஃபேஸ் பேக்:

வீக்கத்தை குறைக்கவும், சருமத்திற்கு ஊட்டமளிக்கவும் இந்தப் பேக் உதவுகிறது. இதற்காக, 1 தேக்கரண்டி கடலை மாவு, அரை தேக்கரண்டி மஞ்சள் தூள் மற்றும் 2 தேக்கரண்டி கிரீன் டீ ஆகியவற்றை எடுத்துக் கொள்ளலாம். இவை அனைத்தையும் ஒன்றாக சேர்த்து கலக்கி பசை பதத்திற்கு மாற்றி, உங்கள் முகத்தில் தடவி, 15 நிமிடங்களுக்கு பிறகு குளிர்ந்த நீரால் கழுவவும்.

புதினா மற்றும் கிரீன் டீ ஃபேஸ் பேக்:

சருமத்தில் ஏற்படும் வீக்கம் போன்றவற்றை குணப்படுத்த இது உதவுகிறது. இதை தயார் செய்ய 2 தேக்கரண்டி கிரீன் டீ, 2 தேக்கரண்டி புதினா இலை விழுது மற்றும் 1 தேக்கரண்டி தேன் ஆகியவற்றை ஒன்றாக எடுத்து கலக்க வேண்டும். இதை முகத்தில் தடவிய பின்னர், சுமார் 15 நிமிடங்கள் கழித்து கழுவி விடலாம்.

மேலும் படிக்க: உங்கள் சருமத்தின் ஆரோக்கியத்தை மேம்படுத்த உதவும் 5 உணவுகள்

அரிசி மாவு மற்றும் கிரீன் டீ ஃபேஸ் பேக்:

உங்கள் முகத்திற்கு உடனடி பொலிவை கொடுக்க இந்த ஃபேஸ் பேக் பயன்படும். 2 தேக்கரண்டி அரிசி மாவு, 1 தேக்கரண்டி கிரீன் டீ தூள் மற்றும் சில துளிகள் எலுமிச்சை சாறு ஆகியவற்றை சேர்த்து ஒன்றாக கலந்து இதனை தயாரிக்கவும். இதை முகத்தில் தடவி சுமார் 20 நிமிடங்களுக்கு பின்னர் குளிர்ந்த நீர் கொண்டு கழுவி விடலாம்.

தேன் மற்றும் கிரீன் டீ ஃபேஸ் பேக்:

இது முகத்திற்கு ஈரப்பதத்தை அளித்து, நீரேற்றத்துடன் வைக்க உதவுகிறது. இதற்காக 2 தேக்கரண்டி தேன் மற்றும் 1 தேக்கரண்டி கிரீன் டீ சேர்த்து கலக்கவும். அதன் பின்னர், இந்தக் கலவையை முகத்தில் தடவலாம். இதையடுத்து, சிறிது நேரத்திற்கு பின்னர் குளிர்ந்த நீரால் முகத்தை கழுவி விட வேண்டும். இந்த ஃபேஸ் பேக்குகளில் உங்கள் சருமத்திற்கு ஏற்றதை பயன்படுத்தலாம்.

எத்தனை முறை பயன்படுத்த வேண்டும்?

இது போன்ற கிரீன் டீ ஃபேஸ் பேக்கை வாரத்திற்கு ஒரு முறை பயன்படுத்துவது சிறந்தது. இவ்வாறு தொடர்ச்சியாக பின்பற்றி வந்தால் நல்ல மாற்றத்தை உணரலாம்.

இந்தக் கட்டுரை உங்களுக்குப் பிடித்திருந்தால், அதைப் பகிரவும் மேலும் இதே போன்ற பிற கட்டுரைகளைப் படிக்க Her Zindagi உடன் இணைந்திருங்கள்.

Image Credit: Freepik