Winter Diet: குளிர்காலத்தில் உடல் ஆரோக்கியத்தை பாதுகாக்க உதவும் 5 உணவுகள்; இவற்றை அவசியம் சாப்பிடவும்

குளிர்காலத்தில் வெப்பநிலை குறையும் போது, நமது உடல் வெப்பநிலையை சீராக வைப்பதற்கு அதிக ஆற்றல் தேவைப்படுகிறது. அதேசமயம், சூரிய ஒளி குறைவு மற்றும் குளிர்ந்த காற்று காரணமாக நம் உடலின் நோய் எதிர்ப்பு மண்டலம் சற்று பலவீனமடைய வாய்ப்புள்ளது. இதனால் சளி, காய்ச்சல் மற்றும் உடல் சோர்வு போன்றவை ஏற்படுவது வழக்கம்.

குளிர்காலத்தில் உடல் ஆரோக்கியத்தை பாதுகாக்க உதவும் உணவுகள்:

எனினும், குளிர்கால நோய்களிலிருந்து நம்மை எளிதாக பாதுகாத்து கொள்ளலாம். குளிர்காலத்தில் உங்கள் உடலை சீரான வெப்ப நிலையிலும், ஆரோக்கியமாகவும் வைத்திருக்க உதவும் 5 முக்கியமான உணவுகளை இதில் காணலாம்.

வேர் காய்கறிகள்:

குளிர்காலத்தில் பூமிக்கு அடியில் விளையக்கூடிய வேர் காய்கறிகள் சந்தையில் நிறைய கிடைக்கும். இவை சுவைக்காக மட்டுமல்ல, குளிர்காலத்தை சமாளிக்கும் ஆற்றலை உடலுக்குத் தருவதிலும் சிறந்தவை. பீட்ரூட், கேரட் போன்றவற்றை இதற்கு உதாரணமாக கூறலாம்.

• ஊட்டச்சத்துக்கள்: இவற்றில் பீட்டா-கரோட்டின் (Beta-carotene), வைட்டமின் சி மற்றும் வைட்டமின் ஏ நிறைந்துள்ளன.
• இந்த சத்துகள் உடலின் நோய் எதிர்ப்பு சக்தியை அதிகரித்து, சளி மற்றும் காய்ச்சலை உண்டாக்கும் வைரஸ்களிலிருந்து பாதுகாப்பளிக்கின்றன.
• இவை ஜீரணமாக அதிக நேரம் எடுக்கும் என்பதால், உடலில் வெப்பத்தை உண்டாக்கி நீண்ட நேரத்திற்கு ஆற்றலை தருகின்றன. இவற்றை சூப் அல்லது சாலட் செய்து சாப்பிடுவது சிறந்தது.

சிட்ரஸ் பழங்கள்:

ஆரஞ்சு, திராட்சை, எலுமிச்சை போன்ற சிட்ரஸ் பழங்களை அவசியம் குளிர்காலத்தில் சாப்பிட வேண்டும். மேலும், ஸ்ட்ராபெர்ரி, மாம்பழம் மற்றும் கிவி பழங்களிலும் வைட்டமின் சி உள்ளது.

• நோய் எதிர்ப்பு சக்தி: சிட்ரஸ் பழங்களில் உள்ள வைட்டமின் சி, வெள்ளை அணுக்களின் உற்பத்தியை அதிகரித்து நோய் எதிர்ப்பு மண்டலத்தை வலுப்படுத்துகிறது.
• மனநிலை மாற்றம்: வைட்டமின் சி உடல் ஆரோக்கியத்திற்கு மட்டுமல்ல, மனநிலையை மேம்படுத்தவும் உதவுகிறது. குளிர்கால நாட்களில் உற்சாகமாக இருக்க இந்த பழங்கள் உதவும்.

மேலும் படிக்க: Immunity Boosting Fruits: குளிர்காலத்தில் நோய் எதிர்ப்பு சக்தியை அதிகரிக்க உதவும் இந்த 6 பழங்களை அவசியம் சாப்பிடவும் 

வைட்டமின் டி நிறைந்த உணவுகள்:

குளிர்காலத்தில் பகல் பொழுது குறைவாகவும், இரவு நேரம் அதிகமாகவும் இருக்கும். சூரிய ஒளி போதிய அளவு கிடைக்காததால், பலருக்கும் வைட்டமின் டி குறைபாடு ஏற்பட வாய்ப்புள்ளது. இதை உணவின் மூலம் சரிசெய்ய வேண்டும். சால்மன் மீன், முட்டையின் மஞ்சள் கரு, செறிவூட்டப்பட்ட தானியங்கள், பால் போன்றவற்றில் இருந்து இந்த சத்தை பெறலாம்.

• எலும்பு ஆரோக்கியம்: கால்சியம் சத்தை உடல் உறிந்து கொள்வதற்கு வைட்டமின் டி அவசியம். இது எலும்புகளை வலுவாக வைக்கிறது.
• மனநலம்: வைட்டமின் டி குறைபாட்டினால் ஏற்படும் மனச்சோர்வை தடுக்க இந்த உணவுகள் உதவுகின்றன. சைவ உணவு உண்பவர்கள் பால் மற்றும் காளான்களை அதிகம் சேர்த்துக் கொள்ளலாம்.

முழு தானியங்கள்:

குளிர்காலத்தில் ஆற்றலை அதிகரிக்க ஏதேனும் சாப்பிடத் தோன்றும் போது, முழு தானியங்கள் சிறந்த தேர்வாகும். இவை உடலுக்கு தேவையான ஆற்றலை வழங்குகின்றன. ஓட்ஸ், கோதுமை மற்றும் தினை வகைகள் இதற்கு சரியாக இருக்கும்.

• சின்க்: ஓட்ஸ் போன்ற தானியங்களில் சின்க் நிறைந்துள்ளது. இது நோய் எதிர்ப்பு மண்டலம் சரியாக செயல்பட மிக அவசியம்.
• இருதய ஆரோக்கியம்: இவற்றில் உள்ள கரையக்கூடிய நார்ச்சத்து, உடலில் உள்ள கெட்ட கொழுப்பை குறைத்து இருதய ஆரோக்கியத்தை மேம்படுத்துகிறது.
• பசியை கட்டுப்படுத்தும்: குளிர்கால காலை வேளையில் ஓட்ஸ் கஞ்சி சாப்பிடுவது நீண்ட நேரத்திற்கு பசி எடுக்காமல் உடலை சுறுசுறுப்பாக வைக்கும்.

மேலும் படிக்க: Herbal Tea for Winter: குளிர்காலத்தில் உங்கள் நோய் எதிர்ப்பு சக்தியை அதிகரிக்க உதவும் 5 மூலிகை தேநீர்

பருப்பு மற்றும் விதை வகைகள்:

மாலையில் சிற்றுண்டி சாப்பிட வேண்டும் என்று தோன்றினால், எண்ணெயில் பொரித்த உணவுகளுக்கு மாற்றாக பாதாம், வால்நட், முந்திரி மற்றும் பிஸ்தா போன்றவற்றை சாப்பிடலாம்.

• ஆன்டி-ஆக்ஸிடன்ட்கள்: இவற்றில் அதிகப்படியான ஆன்டி-ஆக்ஸிடன்ட்கள் மற்றும் தாது உப்புக்கள் உள்ளன. இவை செல்கள் சேதமடைவதை தடுக்கின்றன.
• உடல் வெப்பம்: நட்ஸ் சாப்பிடுவது உடலில் இயற்கையாகவே வெப்பத்தை உண்டாக்கி, குளிரை தாங்கும் சக்தியை தரும்.

இந்த 5 வகை உணவுகளை உங்கள் தினசரி டயட்டில் எளிதாக சேர்க்கலாம். அத்துடன் போதுமான அளவு தண்ணீர் குடித்து, உடலை நீரேற்றமாக வைத்திருப்பதும் மிக அவசியம். இவ்வாறு செயல்பட்டால் குளிர்காலத்தில் ஆரோக்கியமாக இருக்க முடியும்.

இந்தக் கட்டுரை உங்களுக்குப் பிடித்திருந்தால், அதைப் பகிரவும் மேலும் இதே போன்ற பிற கட்டுரைகளைப் படிக்க Her Zindagi உடன் இணைந்திருங்கள்.

Image Credit: Freepik