குளிர்காலத்தில் முடி வறண்டு காணப்படுகிறதா? இதோ வீட்டு வைத்தியம்!!!

குளிர்காலத்தில் சருமம் மட்டுமல்ல, தலைமுடியின் ஆரோக்கியமும் பாதிக்கப்படுகிறது. குறிப்பாக வறண்ட முடி உள்ளவர்கள், குளிர் காலத்தில் இன்னும் கூடுதலாக பல பிரச்சனைகளை சந்திக்க வேண்டியிருக்கும்.

தலைமுடி வறண்டு மோசமாக மாறுவதை கண்டு பதற்றமடைந்து, பலர் கடைகளில் கிடைக்கும் தலைமுடி பராமரிப்பு பொருட்களைப் பயன்படுத்தத் தொடங்குகின்றனர். ஆனால் கடைகளில் கிடைக்கும் பொருட்கள் மட்டுமின்றி, சமையலறையில் இருக்கும் சில பொருட்களை பயன்படுத்தியும் தலைமுடியின் ஆரோக்கியத்தையும் மேம்படுத்தலாம்.

அப்படிப்பட்ட 3 விஷயங்களைப் பற்றி தான், இந்த பதிவில் பார்க்கவிருக்கிறோம். இது உங்கள் சமையலறையில் எளிதாக காணப்படும் மற்றும் உங்கள் தலைமுடிக்கு மிகவும் பயனுள்ளதாக இருக்கும்.

பால்

• குளிர்காலத்தில் தலைமுடியில் பால் தடவுவதால் பல நன்மைகள் உள்ளன. NCBI அறிக்கையின்படி, பாலில் அதிக புரதம் உள்ளது.

• இதில் கேசீன் என்ற புரதம் உள்ளது, இது முடியை மென்மையாக்குவதோடு, வலுவாகவும் அடர்த்தியாகவும் மாற்றுகிறது.

• மறுபுறம், பாலில் கால்சியத்தின் அளவும் மிக அதிகமாக உள்ளது. இது முடி வளர்ச்சியை மேம்படுத்தி முடி உதிர்வதைத் தடுக்கிறது.

• பாலில் வைட்டமின்-D உள்ளது. இது புதிய மயிர்க்கால்களின் வளர்ச்சியை ஊக்குவிக்கிறது. இதனால் புதிய முடி உற்பத்தியாகிறது.

• பாலில் வைட்டமின்-A, B6 மற்றும் பொட்டாசியம் உள்ளதால் முடியை மென்மையாகவும், பளபளப்பாகவும் மாற்றுகிறது.

• நீங்கள் நேரடியாக தலைமுடிக்கு பால் பயன்படுத்தலாம். உங்கள் தலைமுடி எண்ணெய் பசையாக இருந்தால், காய்ச்சாத பாலுக்கு பதிலாக காய்ச்சிய பாலை பயன்படுத்த வேண்டும். தேன், சோற்றுக்கற்றாழை போன்றவற்றை பாலில் சேர்த்து பயன்படுத்தி வந்தால், அது கூந்தலுக்கு மேலும் பலன் தரும்.

வாழைப்பழம்

• வாழைப்பழத்தின் பாரம்பரிய மற்றும் மருத்துவ பயன்பாடு குறித்து ஜர்னல் ஆப் பார்மாகாஃனோசி அண்ட் பைட்டோகெமிஸ்ட்ரி-ஆல் வெளியிடப்பட்ட ஆய்வில், வாழைப்பழத்தை முடிக்கு பயன்படுத்துவதால் பல நன்மைகள் கிடைப்பதாக தெரிவிக்கப்பட்டுள்ளது.

• வாழைப்பழம் ஒரு இயற்கையான மாய்ஸ்சரைசர், இது தலைமுடிக்கு பொலிவைத் தருவதாக ஆய்வில் கூறப்பட்டுள்ளது. எனவே இதை கண்டிஷனராகவும் பயன்படுத்தலாம்.

• குறிப்பாக பொடுகு பிரச்சனை இருந்தால், வாழைப்பழம் அதனை குறைத்து முடியை மென்மையாக்குகிறது. அதுமட்டுமின்றி, மேலும் தலைமுடி உடைவதையும் வாழைப்பழம் தடுக்கிறது. சிறந்த விஷயம் என்னவென்றால், வாழைப்பழம் முடியின் நீளும் தன்மையை அதிகரிக்கிறது.

• குளிர்காலத்தில் உங்கள் தலைமுடி வறண்டிருந்தால், மதிய நேரத்தில், வாழைப்பழத்தை மசித்து தயிருடன் கலந்து தலைமுடியில் தடவி, 30 நிமிடங்களுக்குப் பிறகு ஷாம்பூவால் தலையை அலசவும். இதன் பலன்களை கண்டு வியந்துவிடுவீர்கள்.

நெய்

• வீட்டின் சமையலறையில் நெய் எளிதில் கிடைக்கும். நெய்யை முடிக்கு தடவுவதால் பல நன்மைகள் கிடைக்கும்.

• ஹெல்த்லைன் தளத்தின் கூற்றுப்படி, நெய்யில் வைட்டமின்-E மற்றும் வைட்டமின்-A உள்ளது, இது முடியை சீராக்குகிறது. உங்கள் தலைமுடி வறண்டு போய் இருந்தால், குளிர்காலத்தில் உங்கள் தலைமுடிக்கு நெய் தடவுவது சிறந்த தேர்வாகும்.

• மிகவும் மெல்லிய தலைமுடிக்கு நெய் ஒரு வரப்பிரசாதம் என்றே கூறலாம். இதை பயன்படுத்தினால் தலைமுடி அடர்த்தியாக மாறும். உச்சந்தலை பராமரிப்புக்கும் நெய் மிகவும் நன்மை பயக்கும்.

நீங்கள் அதை நேரடியாக கூந்தலுக்கு தடவலாம் மற்றும் கற்றாழை அல்லது ரோஸ் வாட்டருடன் கலந்து முடியில் தடவலாம். இதுவும் தலைமுடியை பளபளப்பாக மாற்றுகிறது. மேலும் முடி மென்மையாகவும் மாறும், ஆனால் எண்ணெய் பிசுக்கான தலையில் நெய் பயன்படுத்த வேண்டாம்.

இந்த தகவல் உங்களுக்கு நிச்சயம் பயனுள்ளதாக இருந்திருக்குமென நம்புகிறோம். இந்த பதிவு பிறருக்கும் பயன்பெற இதனை பகிரலாமே. மேலும் லைக் செய்யவும், பதிவு குறித்த உங்கள் கருத்தினை கமெண்ட் செய்யவும். ஹெர்ஷிந்தகி தமிழ் பக்கத்தில் இணைவதன் மூலமாக தொடர்ந்து பயனுள்ள பதிவை காணலாம்.

Images Credit: freepik