நமது உடலின் முக்கியமான உள்ளுறுப்புகளில் ஒன்று, பித்தப்பை. இது, கல்லீரலுக்கு கீழே அமைந்துள்ள ஒரு சிறிய பை . இந்த பை, கல்லீரல் வெளியிடும் பித்தநீரைசேமித்து வைக்கிறது. உணவுகளை செரிப்பதற்கு பித்தநீர் உதவுகிறது.
இந்த பித்தநீரில் இருக்கும் கொழுப்புகள் மற்றும் பிற பொருட்களில் ஏற்றத்தாழ்வுகள் ஏற்படும்போது பித்தப்பை தாக்குதல் ஏற்படுகிறது. பித்தப்பை தாக்குதல், பிலியரி கோலிக் தாக்குதல் எனப்படுகிறது. இது ஒரு தீவிரமான ஆரோக்கிய பிரச்சனையாகும்.
பித்தப்பையில் உள்ள நீர் சரியாக பாயாமல் இருந்தால், அதன் விளைவாக வீக்கமும், கடுமையான வலியும் ஏற்படும்.
பித்தப்பை பிரச்சனை அறிகுறிகள்
மேல் வயிற்றுவலி பித்தப்பையில் பிரச்சனை இருந்தால் வெளிப்படும் முதல் அறிகுறி, வயிற்றுவலிதான். அதுவும் இந்த வலியானது வயிற்றின் மேல்பகுதியில், விலா எலும்புகளுக்கு கீழே ஏற்படும். குறிப்பாக இந்த வலி லேசாக இல்லாமல், கூர்மையானதாக, தாங்க முடியாத அளவில் இருக்கும்.
வலது தோள்பட்டை, முதுகு வலி பித்தப்பையில் பிரச்சனை இருந் தால், வயிற்றுப்பகுதியில் வலி தொடங்கி, அந்த வலி அப்படியே மேல்முதுகு மற்றும் வலது தோள் பட்டைவரை பரவும். இந்த வலி மிகவும் கடுமையானதாக இருக்கும்.
குமட்டல், வாந்தி
ஒருவரின் பித்தப்பையில் கற்கள் உருவாகி அதனால் பிரச்சனை ஏற்பட்டிருந்தால், அவருக்கு குமட்டல், வாந்தி, காய்ச்சல், குளிர் போன்றவை ஏற்படும். எனவே வயிற்றுவலியுடன் குமட்டல், வாந்தியையும் சந்தித்தால் உடனே மருத்துவரை அணுக வேண்டும்.
அஜீரணக் கோளாறு, வயிறு வீக்கம்
அஜீரணக் கோளாறானது பல்வேறு ஆரோக்கிய பிரச்சனைகளின் அறிகுறியாக இருக்கலாம். அதில் ஒன்றுதான் பித்தப்பை பிரச்சனை. ஒருவரது பித்தப்பை சரியாக செயல்படாவிட்டால், அது பல இரைப்பை பிரச்சனைகளை உண்டாக்கும், வயிற்று உப்புசத்தை ஏற்படுத்தும்
மஞ்சள் நிறத்தில் தோல், கண்கள்
பித்தப்பையில் இருந்து செல்லும் பித்த நாளத்தில் அடைப்பு ஏற்பட்டால், ரத்த ஓட்டத்தில் பித்தம் படிந்து, அது சருமம் மற்றும் கண்களை மஞ்சள் நிறத்தில் மாற்றும். இப்படியான நிலை, பித்தப்பையில் ஏற்பட்டுள்ள கடுமையான பிரச்சனையின் அறிகுறியாகும்.
சாம்பல், வெளிர் நிறத்தில் மலம்
பித்தப்பையில் அடைப்பு ஏற்பட்டு, பித்தநீர் ஓட்டத்தில் தடை ஏற்படும்போது, அதன் விளைவாக சாம்பல் அல்லது வெளிர் நிறத்தில் மலம் வெளியேறும்.
அடர்நிற சிறுநீர்
பித்தப்பையில் பிரச்சனை இருந்தால், ரத்த ஓட்டத்தில் பிலிரூபின் அதிகரித்து, அதன் விளைவாக அடர்நிறத்தில் சிறுநீர் வெளியேறும். அடர்நிற சிறுநீருக்கு பல காரணங்கள் இருந்தாலும், பித்தப்பை தாக்குதல் ஒரு முக்கியமான காரணமாகும்.