Bitter Gourd:பாகற்காயில் உள்ள ஆரோக்கிய நன்மைகள்!

பாகற்காய் என்றாலே அலறியடித்தும் ஓடும் நபர்களில் ஒருவராக நீங்கள்? இதில் உள்ள ஆரோக்கிய நன்மைகள் தெரிந்தால் ஒருபோதும் இனி இந்த தவறை மறந்தும் செய்யமாட்டீர்கள். ஆம் கசப்புத்தன்மையுடன் பாகற்காய் இருந்தாலும் இதில் எண்ணிலடங்கா ஊட்டச்சத்துக்கள் உள்ளது. பல நோய்களுக்கும் தீர்வு காண்பதற்கு உதவியாக உள்ளது. இதோ பாகற்காய் சாப்பிடுவதால் என்னென்ன ஆரோக்கிய நன்மைகளை நாம் பெற முடியும்? என்பது குறித்து இங்கே அறிந்துக் கொள்வோம்.

பாகற்காயில் உள்ள ஆரோக்கிய நன்மைகள்:

மேலும் படிங்க :கோழி கறி சுவையை மிஞ்சும் காளான் மிளகு மசாலா

• சர்க்கரை நோய் உள்ளவர்கள் பாகற்காயை அதிகளவில் உணவில் சேர்த்துக் கொள்ள வேண்டும் என்ற வார்த்தைகளை அதிகளவில் பலர் கூறுவதைக் கேட்டிருப்போம். ஆம் இதில் உள்ள ஆன்டிஆக்ஸிடன்ட்கள் உள்ளிட்ட பல்வேறு ஊட்டச்சத்துக்கள் உங்களின் இன்சுலின் அளவைக் கட்டுப்படுத்த உதவுகிறது. உடலில் உள்ள சர்க்கரை அளவை இயற்கையான முறையில் கட்டுப்படுத்தும் பண்புகள் உள்ளதாகவும் மருத்துவர்கள் கூறுகின்றனர்.
• குளிர்காலம் மற்றும் வெயில் காலத்திலும் கூட உங்களது சருமத்தை அழகாக்க காட்ட வேண்டும் என்றால், பாகற்காயை உணவில் சேர்த்துக் கொள்ளுங்கள். இதில் உள்ள ஆன்டி ஆக்ஸிடன்ட்கள் சருமத்திற்கு ஆரோக்கியத்தையும் கொடுக்கும். மேலும் தோல் சுருக்கத்தையும் குறைத்து விரைவில் வயதானத் தோற்றத்தைத் தடுக்கிறது.
• இதில் உள்ள வைட்டமின் ஏ உள்ளிட்ட ஊட்டச்சத்துக்கள் உள்ளதால் கண்பார்வை பிரச்சனைகளுக்குத் தீர்வு காண்பதற்கு உதவியாக உள்ளது.
• பாகற்காயில் வைட்டமின் சி, வைட்டமின் ஏ, பொட்டாசியம், இரும்புச்சத்து போன்ற ஊட்டச்சத்துக்கள் உள்ளதால் உடலின் நோய் எதிர்ப்பு மண்டலத்தை வலுப்படுத்துகிறது. பருவ கால தொற்றுகள் எதுவும் ஏற்படாமல் உடல்நலத்தைப் பாதுகாக்கிறது.
• மேலும் இதில் உள்ள பல்வேறு ஊட்டச்சத்துக்கள் இரத்தத்தை சுத்தப்படுத்தவும், செரிமான பிரச்சனைகளைத் தீர்க்கவும் உதவியாக உள்ளது. சுவாச ஆரோக்கியத்தையும், தோல் ஆரோக்கியத்தையும் மேம்படுத்துகிறது.
• இரும்புச்சத்துக்கள் அதிகம் கொண்ட பாகற்காயில் உங்களது உணவுமுறையில் சேர்த்துக் கொள்ளும் போது ரத்த சோகை ஏற்படுவதைத் தடுக்கவும் உதவியாக உள்ளது.
• பாகற்காயில் நச்சுநீக்கும் பண்புகள் அதிகளவில் உள்ளது. எனவே குழந்தைகளுக்குக் கொஞ்சம் கொஞ்சமாக கொடுத்து பழகும் போது வயிற்றுப்பூச்சிகளையும் அழிக்கிறது. இது போன்ற பல்வேறு ஆரோக்கிய நன்மைகள் உள்ளதால் இனி ஒருபோதும் பாகற்காயை உங்களது உணவில் முறையில் சேர்த்துக் கொள்வதற்கு மறந்துவிடாதீர்கள்.

கசப்பு சுவைக் கொண்ட பாகற்காயை வீட்டில் உள்ள குழந்தைகளுக்கும் கொடுத்து பழக வேண்டும் என்று நினைத்தால் பாகற்காய் குழம்பு, வெங்காயம் அதிகம் சேர்த்து பாகற்காய் பொரியல் என ஒரே மாதிரியாக செய்யாதீர்கள். பாகற்காய் பக்கோடா, பாகற்காய் வறுவல், பாகற்காய் சிப்ஸ், பாகற்காய் முட்டை பொரியல், பாகற்காய் புலாவ், பாகற்காய் கலவை சாதம், பாகற்காய் இட்லி பொடி, பாகற்காய் பிட்லூ என பல வெரைட்டிகளில் நீங்கள் செய்து சாப்பிடலாம்.