தினசரி கிராம்பு நீர் அருந்துவதன் மூலம் உடலுக்கு கிடைக்கும் ஆரோக்கிய நன்மைகள்

நமது சமையலறையில் இருக்கும் மசாலா பொருட்களில், எளிமையான மற்றும் மருத்துவ ஆற்றல் மிகுந்த பொருளாக கிராம்பு விளங்குகிறது. அன்டிஆக்ஸிடன்ட்கள் நிரம்பிய இந்தக் கிராம்பு, கல்லீரல் ஆரோக்கியம், வாய் சுகாதாரம் போன்ற பல்வேறு நன்மைகளை அளிக்கிறது. 

இரவில் ஊறவைத்த கிராம்பு நீரை, காலையில் வெறும் வயிற்றில் அருந்துவதை சிலர் வழக்கமாக கொண்டுள்ளனர். இதன் மூலம் நமக்கு கிடைக்கும் ஆரோக்கிய நன்மைகள் என்னவென்று இந்தப் பதிவில் பார்க்கலாம்.

செரிமானத்தை மேம்படுத்தும்:

இதனை தொடர்ந்து எடுத்துக் கொள்வதன் மூலம் செரிமானம் மேம்படும், வயிறு உப்புசம் குறையும். கிராம்பு நீர் செரிமான அமைப்பை தூண்டி, உணவை ஜீரணிக்க உதவும் என்சைம்களின் உற்பத்தியை அதிகரிக்கிறது. கிராம்பு நீர் குடிப்பதால், காலையில் வயிறு உப்புசம் மற்றும் கனமான உணர்வு குறையும். இது வாயுத் தொல்லை, அஜீரணம் மற்றும் செரிமான பிரச்சனைகளை சரிசெய்ய உதவுகிறது. கிராம்பில் உள்ள இயற்கை சேர்மங்கள் வயிற்றின் உள் அடுக்கிற்கு நிவாரணம் அளித்து, உணவு அசௌகரியமின்றி செரிமான மண்டலத்தின் வழியாக கடந்து செல்ல உதவுகிறது.

மேலும் படிக்க: வீட்டிலேயே இருக்கும் அற்புத மருந்துகள்; சளி மற்றும் இருமலுக்கு தீர்வு அளிக்கும் இயற்கை வைத்திய முறை

நோய் எதிர்ப்பு சக்தியை மேம்படுத்தும்:

கிராம்பில் உள்ள அன்டிஆக்ஸிடன்ட் மற்றும் நுண்ணுயிர் எதிர்ப்பு பண்புகள் (Antimicrobial properties), நோய்த் தொற்றுகளுக்கு எதிராக போராட உடலுக்கு சக்தி அளிக்கின்றன. தினசரி கிராம்பு நீரை அருந்துவது, நோய் எதிர்ப்பு சக்தியை பலப்படுத்துகிறது. இது சளி மற்றும் காய்ச்சலுக்கு எதிராக உடலின் இயற்கையான பாதுகாப்பை அதிகரிக்கிறது. கிராம்பு நீரின் அன்டிஆக்ஸிடன்ட்கள், செல்களை சேதப்படுத்தும் ஃப்ரீ ரேடிக்கல்களை (Free Radicals) நீக்கி, காலப்போக்கில் குறையும் நோய் எதிர்ப்பு சக்தியை அதிகரிக்க உதவுகின்றன.

மேலும் படிக்க: கல்லீரல் ஆரோக்கியத்தை மேம்படுத்த என்ன செய்ய வேண்டும்? அவசியம் பின்பற்ற வேண்டிய 5 குறிப்புகள்

பல் வலி போன்ற பிரச்சனைகளை குணப்படுத்தும் ஆற்றல்:

பல் வலிக்கு கிராம்பு எண்ணெய் பயன்படுத்தப்படுகிறது. அதேபோல், கிராம்பு நீரின் பாக்டீரியா எதிர்ப்பு பண்புகள் வாய் ஆரோக்கியத்தை பராமரிக்க உதவுகின்றன. கிராம்பு நீரில் உள்ள பாக்டீரியா எதிர்ப்பு பண்புகள், வாய் துர்நாற்றம், பல் மற்றும் ஈறு தொற்றுகளுக்கு காரணமான பாக்டீரியாக்களை நீக்குகின்றன. இது வாயில் ஏற்படும் வீக்கத்தை குறைத்து, வலியிலிருந்து நிவாரணம் அளிக்கிறது. மேலும், ஈறுகளை பலப்படுத்தி, சுவாசத்தை புத்துணர்ச்சியுடன் வைத்திருக்கிறது.

வலிக்கு நிவாரணம் அளிக்கும்:

கிராம்பு நீரில் உள்ள யூஜெனால் (Eugenol), ஆற்றல் மிகுந்த அழற்சி எதிர்ப்பு பண்புகளை (Anti-inflammatory properties) கொண்டுள்ளது. இந்த அழற்சி எதிர்ப்பு பண்புகள், உடலில் நாள்பட்ட வீக்கத்தை குறைக்க உதவுகின்றன. நாள்பட்ட வீக்கம் (Chronic Inflammation) மூட்டு வலி, தசை பிடிப்பு போன்ற பிரச்சனைகளுக்கு வழிவகுக்கும். தினசரி கிராம்பு நீரை அருந்துவது, லேசான மூட்டுவலி உள்ளவர்கள் மற்றும் தொடர்ந்து உடற்பயிற்சி செய்பவர்களுக்கு ஏற்படும் மூட்டு பிடிப்பு மற்றும் தசை வலியை குறைக்க உதவுகிறது. இது சருமத்தின் அழற்சியை குறைத்து, பொலிவான சருமத்தை பெற உதவுகிறது.

இத்தகைய ஆரோக்கிய நன்மைகள் நிறைந்த கிராம்பை, நீரில் ஊறவைத்து குடிப்பதன் மூலம் பல்வேறு பலன்களை நாம் பெறலாம்.

இந்தக் கட்டுரை உங்களுக்குப் பிடித்திருந்தால், அதைப் பகிரவும் மேலும் இதே போன்ற பிற கட்டுரைகளைப் படிக்க Her Zindagi உடன் இணைந்திருங்கள்.

Image Credit: Freepik