நம் வீட்டு பால்கனி தோட்டத்திலேயே ஸ்ட்ராபெர்ரி பழங்களை ஈசியாக பெறலாம்; இந்த டிப்ஸை மட்டும் ஃபாலோ பண்ணுங்க

நம் வீட்டு பால்கனியில் இருக்கும் சிறிய தொட்டிகளில் கூட  ஸ்ட்ராபெர்ரி பழங்களை எளிதாக வளர்க்க முடியும். இதற்கான வழிமுறைகளை இந்தப் பதிவில் காணலாம். இதனை பராமரிப்பதும் சுலபமாக இருக்கும்.

சரியான தொட்டி மற்றும் வடிகால் அமைப்பு:

ஸ்ட்ராபெர்ரி செடியின் வேர்கள் ஆரோக்கியமாக வளர, குறைந்தது 12 அங்குலம் ஆழமும், அகலமும் கொண்ட தொட்டியை தேர்ந்தெடுக்கவும். தொட்டியில் நிச்சயமாக வடிகால் துளைகள் இருக்கிறதா என்பதை உறுதிப்படுத்திக் கொள்ளுங்கள். இது அதிகப்படியான நீர் தேங்குவதை தடுத்து, வேர் அழுகல் வராமல் பாதுகாக்கும்.

மேலும் படிக்க: மாடித் தோட்டம் வைத்திருப்பவரா நீங்கள்? இந்த காய்கறிகளை இப்போதே விதைத்து குளிர் காலத்தில் அறுவடை செய்யலாம்

தரமான மண் கலவை:

செடிகளுக்கு தரமான மண் மிக முக்கியம். சத்துள்ள, இலகுவான மண் கலவையை பயன்படுத்துங்கள். சாதாரண தொட்டி மண்ணுடன், தென்னை நார்க் கழிவு அல்லது மட்கிய உரம் கலந்து பயன்படுத்துங்கள். இது மண்ணின் நீர்ப்பிடிப்பு திறனை அதிகரிப்பதுடன், காற்றோட்டத்தையும் மேம்படுத்தும். லேசான அமிலத்தன்மை கொண்ட மண்ணில் ஸ்ட்ராபெர்ரிகள் சிறப்பாக காய்க்கும்.

மேலும் படிக்க: மாதுளை வளர்ப்பு: வீட்டிலேயே ஆரோக்கியமான பழங்களை அறுவடை செய்வது எப்படி?

சூரிய ஒளியின் முக்கியத்துவம்:

ஸ்ட்ராபெர்ரி செடிகளுக்கு அதிக சூரிய ஒளி தேவை. தினமும் குறைந்தது 6 முதல் 8 மணிநேரம் நேரடி சூரிய ஒளி படும் இடத்தில் தொட்டிகளை வைக்கவும். அதிக சூரிய ஒளி கிடைத்தால், பழங்கள் பெரியதாகவும், சுவையாகவும், அதிக எண்ணிக்கையிலும் விளையும். இது தவிர, மண்ணின் ஈரப்பதம் குறையாமல், அதிக நீர் தேங்காமல் பார்த்துக் கொள்ள வேண்டும். மேலும், செடியின் இலைகள் மீது நீர் படாமல், செடியின் அடிப்பகுதியில் மட்டும் தண்ணீர் ஊற்றவும். இது பூஞ்சை தாக்குதலை குறைக்க உதவும்.

சரியான வகையில் உரமிடுதல்:

ஊட்டச்சத்துகள் கொண்ட நீர்ம உரம் அல்லது மெதுவாக கரையும் கரிம உரத்தை 2 முதல் 4 வாரங்களுக்கு ஒருமுறை வேர் பகுதியில் இடுங்கள். அதிகப்படியான இலை வளர்ச்சியை ஏற்படுத்தும் அதிக நைட்ரஜன் கலந்த உரங்களை தவிர்க்கவும். இது பழங்களின் மகசூலை குறைத்து விடும். ஈரப்பதத்தை தக்கவைக்க, தொட்டியின் மண் மீது காய்ந்த இலைகள், வைக்கோல் அல்லது தென்னை நார்க் கழிவுகளை கொண்டு பரப்பலாம்.

சரியான நேரத்தில் அறுவடை:

ஸ்ட்ராபெர்ரிகள் முழுவதும் சிவந்து, பழுத்த பின்னரே அறுவடை செய்ய வேண்டும். பறித்த பிறகு அவை அதிகம் பழுக்காது. தொடர்ந்து அறுவடை செய்வது, செடியை மேலும் பழங்களை தரத் தூண்டும். இவை அனைத்தையும் பின்பற்றினால் ஸ்ட்ராபெர்ரி பழங்களை எளிதாக வீட்டிலேயே பெறலாம்.

இந்தக் கட்டுரை உங்களுக்குப் பிடித்திருந்தால், அதைப் பகிரவும் மேலும் இதே போன்ற பிற கட்டுரைகளைப் படிக்க Her Zindagi உடன் இணைந்திருங்கள்.

Image Credit: Freepik