Hibiscus Oil for Hair: குளிர்காலத்தில் கூந்தல் வளர்ச்சியை அதிகரிக்க செம்பருத்தி எண்ணெயை பயன்படுத்துவது எப்படி?

Hair Care Tips: குளிர்காலம் என்றால் சருமம் வறட்சியாகும் என்று நம் எல்லோருக்கும் தெரியும். ஆனால், நம்முடைய கூந்தலும் இந்த பருவநிலை மாற்றத்தால் பாதிக்கப்படுகிறது. காற்றில் ஈரப்பதம் குறைவது, குளிர்ந்த காற்று மற்றும் வெந்நீரில் தலைக்கு குளிப்பது போன்ற காரணங்களால், முடி தனது இயற்கையான எண்ணெய் பசையை இழக்கிறது. இதனால் முடியில் வறட்சி, பொடுகு தொல்லை மற்றும் அதீத முடி உதிர்வு ஏற்படுகிறது. இந்தக் காலக்கட்டத்தில் கூந்தலுக்கு தேவையான கூடுதல் ஊட்டச்சத்தை அளிக்க இயற்கை எண்ணெய்கள் மிக அவசியம் ஆகும்.

முடி வளர்ச்சியை அதிகரிக்க உதவும் செம்பருத்தி எண்ணெய்:

அந்த வகையில், காலங்காலமாக நம் முன்னோர்கள் கூந்தல் பராமரிப்பிற்கு பயன்படுத்தி வரும் ஒரு அற்புத மூலிகை தான் செம்பருத்தி. செம்பருத்தி பூக்கள் மற்றும் இலைகளில் கூந்தல் வளர்ச்சிக்கு தேவையான வைட்டமின்கள் மற்றும் அமினோ அமிலங்கள் நிறைந்துள்ளன. குளிர்காலத்தில் செம்பருத்தி எண்ணெயை எப்படி தயாரிப்பது மற்றும் பயன்படுத்துவது என இதில் விரிவாக காண்போம்.

செம்பருத்தி எண்ணெய் தயாரிப்பது எப்படி?

கடைகளில் கிடைக்கும் கலப்படமான எண்ணெயை விட, வீட்டிலேயே சுத்தமாக தயாரிக்கும் செம்பருத்தி எண்ணெய் கூந்தலுக்கு இரட்டிப்பு பலனை தரும்.

தேவையான பொருட்கள்:

• செம்பருத்தி இலைகள் - 8 முதல் 10
• செம்பருத்தி பூக்கள் - 4 முதல் 5
• சுத்தமான தேங்காய் எண்ணெய் - 100 மி.லி

செய்முறை:

• முதலில் செம்பருத்தி இலைகள் மற்றும் பூக்களை சுத்தம் செய்து, அதை தேங்காய் எண்ணெய்யுடன் சேர்த்து நன்கு சூடுபடுத்த வேண்டும்.
• எண்ணெயை மிதமான சூட்டில் வைத்து, செம்பருத்தி பூ மற்றும் இலைகளின் சாறு அதில் நன்கு இறங்கும் வரை காத்திருக்க வேண்டும்.
• எண்ணெயின் நிறம் மாறியதும் அதனை வடிகட்டி, காற்று நுழையாத ஒரு பாட்டிலில் அடைத்துக் கொள்ளலாம். இவ்வாறு செய்தால் உங்களுக்கு தேவையான செம்பருத்தி எண்ணெய் தயாராகி விடும்.

மேலும் படிக்க: Winter Hair Oils: குளிர்காலத்தில் உங்கள் கூந்தல் வளர்ச்சியை அதிகரிக்க உதவும் 6 எண்ணெய்கள்

செம்பருத்தி எண்ணெயை கூந்தலில் பயன்படுத்தும் முறை:

• இந்த எண்ணெய் கலவையை உச்சந்தலையில் படும்படி தேய்த்து, 7 முதல் 10 நிமிடங்கள் வரை விரல்களால் மெதுவாக மசாஜ் செய்யவும். இது ரத்த ஓட்டத்தை அதிகரிக்கும்.
• மசாஜ் செய்த பிறகு, முடியின் வேர்க்கால்களில் எண்ணெய் இறங்குவதற்காக 30 முதல் 40 நிமிடங்கள் வரை அப்படியே விட்டுவிடவும்.
• பின்னர் ரசாயனம் குறைந்த மிதமான ஷாம்பூ அல்லது சிகைக்காய் பயன்படுத்தி தலைக்கு குளித்து விடலாம்.
• தலைக்கு குளித்த பிறகு, ஈரப்பதத்தை தக்கவைக்க தரமான கண்டிஷனரை பயன்படுத்தவும். இது முடியை மென்மையாகவும், ஆரோக்கியமாகவும் மாற்றும்.
• வாரத்திற்கு 2 முதல் 3 முறை இதை பின்பற்றினால், குளிர்காலத்திலும் உங்கள் முடி அடர்த்தியாக வளரும்.

செம்பருத்தி எண்ணெய் மூலம் கூந்தலுக்கு கிடைக்கும் நன்மைகள்:

செம்பருத்தி எண்ணெயை பயன்படுத்துவதன் மூலம் பல்வேறு நன்மைகள் நம்முடைய கூந்தலுக்கு கிடைக்கின்றன. அவற்றில் சில முக்கியமான அம்சங்களை ஒவ்வொன்றாக பார்க்கலாம்.

மேலும் படிக்க: Dandruff Control Tips: குளிர்காலத்தில் அதிகரிக்கும் பொடுகு தொல்லையை கட்டுப்படுத்த உதவும் வீட்டு வைத்திய முறைகள்

முடி வளர்ச்சியை தூண்டும்:

செம்பருத்தி பூவில் இயற்கையாகவே அமினோ அமிலங்கள் நிறைந்துள்ளன. இவை முடிக்கு தேவையான கெரட்டின் (Keratin) என்ற புரதத்தை உற்பத்தி செய்ய உதவுகின்றன. இது முடியை வேரிலிருந்து உறுதியாக்குவதோடு, முடி உதிர்வதை தடுத்து அடர்த்தியாக வளர உதவுகிறது.

அடர்த்தியான முடி வளர்ச்சிக்கு உதவும்:

முடி உதிர்ந்த இடங்களில் மீண்டும் முடி வளர்வதை தூண்டும் தன்மை இதற்கு இருப்பதாக கூறப்படுகிறது. குறிப்பாக, முடி உதிர்வின் ஆரம்ப கட்டத்தில் இருப்பவர்களுக்கு, இது உதவியாக இருந்து கூந்தல் அடர்த்தியாக வளரச் செய்கிறது.

உச்சந்தலையின் ஆரோக்கியத்தை மேம்படுத்தும்:

சிலருக்கு குளிர்காலத்தில் பொடுகு தொல்லை மற்றும் தலையில் அரிப்பு ஏற்படும். இந்த பிரச்சனைகளை கட்டுப்படுத்த செம்பருத்தி எண்ணெய் பயன்படுகிறது. இது உச்சந்தலையின் பி.ஹெச் (pH) அளவை சமநிலைப்படுத்த உதவுகிறது. மேலும், அதிகப்படியான எண்ணெய் சுரப்பை கட்டுப்படுத்தி, பொடுகு மற்றும் அரிப்பை நீக்குகிறது.

இயற்கையான கண்டிஷனர்:

செம்பருத்தியில் பிசுபிசுப்பு தன்மை கொண்ட வழவழப்பான சாறு உள்ளது. இது இயற்கையான கண்டிஷனராக செயல்படுகிறது. வறண்ட கூந்தலை மென்மையாகவும், பளபளப்பாகவும் மாற்ற இது உதவும்.

இந்த குளிர்காலத்தில் இரசாயன பொருட்களை தவிர்த்து, இயற்கையான செம்பருத்தி எண்ணெயை பயன்படுத்தி உங்கள் கூந்தல் வளர்ச்சியை அதிகரித்து பாதுகாப்பாக பராமரிக்கலாம்.

இந்தக் கட்டுரை உங்களுக்குப் பிடித்திருந்தால், அதைப் பகிரவும் மேலும் இதே போன்ற பிற கட்டுரைகளைப் படிக்க Her Zindagi உடன் இணைந்திருங்கள்.

Image Credit: Freepik