சரும பராமரிப்பில் எலுமிச்சை பயன்படுத்தும் நபரா நீங்கள்? இந்த 4 தவறுகளை மட்டும் பண்ணாதீங்க

எலுமிச்சை பொதுவாக சருமத்திற்கு மிகவும் நன்மை அளிக்கும் ஒன்றாக கருதப்படுகிறது. இதில் உள்ள அதிகப்படியான வைட்டமின் சி மற்றும் சிட்ரிக் அமிலம் காரணமாக, சருமத்தை சுத்தமாகவும், பளபளப்பாகவும் வைத்திருக்க உதவுகிறது. இருப்பினும், எலுமிச்சையை சில தவறான பொருட்களுடன் கலந்து நேரடியாக முகத்தில் பயன்படுத்துகின்றனர். இதனால் பல பக்க விளைவுகள் ஏற்படுகின்றன. எலுமிச்சையுடன் எந்த பொருட்களை கலந்து பயன்படுத்தக் கூடாது என்பது குறித்து விரிவாக பார்க்கலாம்.

எலுமிச்சை மற்றும் பற்பசை (Toothpaste):

எலுமிச்சையுடன் பற்பசையை கலந்து முகத்தில் தடவினால் முகப்பரு மறையும் என்று பலர் நம்புகின்றனர். ஆனால், உண்மையில் இது மிகவும் தீங்கு விளைவிக்கும் ஒரு கலவையாகும். பற்பசையில் உள்ள கடுமையான இரசாயனங்கள், எலுமிச்சையின் அமிலத்தன்மையுடன் சேரும்போது சருமத்தை கடுமையாக எரிச்சலூட்டும். இந்தக் கலவையானது சிவப்பு தடிப்புகள், தோல் உரிதல் மற்றும் அதிக உணர்திறனை ஏற்படுத்தும்.

மேலும் படிக்க: கூந்தல் வளர்ச்சியை அதிகரிக்க உதவும் ஆலிவ் எண்ணெய்; எப்படி பயன்படுத்த வேண்டும் என தெரியுமா?

எலுமிச்சை மற்றும் பேக்கிங் சோடா:

சமூக ஊடகங்களில் பரவலாக பரிந்துரைக்கப்படும் இந்தக் கலவை, உண்மையில் சருமத்திற்கு மிகவும் ஆபத்தானது. எலுமிச்சை அமிலம் நிறைந்தது. ஆனால், பேக்கிங் சோடா காரத்தன்மை (Alkaline) கொண்டது. இவை இரண்டும் கலக்கும் போது ஒரு இரசாயன எதிர்வினை ஏற்பட்டு, சருமத்தின் இயற்கையான பிஹெச் (pH) சமநிலையை குழப்புகிறது. இதனால் சருமம் வறண்டு, இறுக்கமாகி, அதிக உணர்திறன் கொண்டதாக மாறும்.

மேலும் படிக்க: சருமம் மற்றும் கூந்தல் ஆரோக்கியத்தை மேம்படுத்தும் நாவல் பழம்; உங்கள் பராமரிப்பு முறையில் இப்படி பயன்படுத்தவும்

எலுமிச்சை மற்றும் உப்பு:

சிலர் எலுமிச்சை மற்றும் உப்பு பயன்படுத்தி முகத்தை தேய்க்கும் ஸ்க்ரப்பாக உபயோகிக்கின்றனர். எலுமிச்சையின் அமிலமும், உப்புத் துகள்களும் சேரும் போது, அவை சருமத்தில் கண்ணுக்கு தெரியாத கீறல்களை உருவாக்கலாம். இது எரிச்சல் மற்றும் தொற்றுகளுக்கு கூட வழிவகுக்கும். குறிப்பாக, உணர்திறன் வாய்ந்த அல்லது முகப்பரு உள்ள சருமத்திற்கு இது ஏற்றதல்ல.

எலுமிச்சை மற்றும் மஞ்சள்:

மஞ்சளில் பாக்டீரியா எதிர்ப்பு பண்புகள் இருந்தாலும், எலுமிச்சையுடன் கலக்கும் போது இது அனைத்து வகையான சருமத்திற்கும் பொருந்தாது. எலுமிச்சையின் அமிலத்தன்மை மஞ்சளின் சில கூறுகளுடன் சேரும் போது, எரிச்சலை ஏற்படுத்தலாம்.

எனவே, இது போன்ற பொருட்களுடன் எலுமிச்சை சேர்த்து பயன்படுத்துவதை பெரும்பாலும் தவிர்த்து விட வேண்டும். மேலும், இத்தகைய பொருட்களை பயன்படுத்துவதற்கு முன்பாக மருத்துவரின் ஆலோசனை பெறுவது அவசியம் ஆகும்.

இந்தக் கட்டுரை உங்களுக்குப் பிடித்திருந்தால், அதைப் பகிரவும் மேலும் இதே போன்ற பிற கட்டுரைகளைப் படிக்க Her Zindagi உடன் இணைந்திருங்கள்.

Image Credit: Freepik